Қирғиз Республикаси Бош прокуратураси Юридик академияси билан академик ҳамкорлик мустаҳкамланмоқда

Академия ташкил этилганининг уч йиллиги муносабати билан ўтказилган “Замонавий чақириқлар шароитида қонун устуворлигини таъминлаш: муаммо ва ечимлар” мавзусидаги халқаро илмий-амалий конференция доирасида, шунингдек, Ўзбекистон Республикаси Ҳуқуқни муҳофаза қилиш академияси ва Қирғиз Республикаси Бош прокуратураси ҳузуридаги Юридик академия ўртасида ўзаро ҳамкорлик тўғрисидаги Меморандум имзоланди.

Мазкур ҳужжат икки таълим муассасаси ўртасидаги дўстона муносабатларни ривожлантиришда муҳим қадам бўлиб, узоқ муддатли ва барқарор ҳамкорлик учун мустаҳкам асос яратади. Меморандум доирасида илмий ва таълим ўқув салоҳиятини мустаҳкамлаш, таълим ва илмий тадқиқот йўналишларини кенгайтириш, қўшма ташаббуслар ва илмий-амалий дастурларни амалга ошириш, профессор-ўқитувчилар ҳамда тингловчи-талабалар ўртасида академик алмашинувни йўлга қўйиш, илғор тажриба ва амалиётлар билан ўзаро алмашиш каби вазифалар белгиланган.

Қирғиз Республикаси Бош прокуратураси ҳузуридаги Юридик академия мамлакат ҳуқуқий тизими учун юқори малакали кадрлар тайёрлайдиган ихтисослаштирилган олий таълим муассасасидир. Академия прокуратура, адлия, ҳуқуқни муҳофаза қилувчи ва суд органлари учун кадрлар тайёрлаш тизимини такомиллаштиришга қаратилган. Унда прокурорлик ва суд фаолияти, юриспруденция, суд экспертизаси, ахборот хавфсизлиги каби йўналишларда олий ҳамда олий таълимдан кейинги таълим дастурлари амалга оширилади. Шунингдек, Академия халқаро таълим ва илмий мақомга эга турли ташкилотлар билан халқаро ҳамкорликни фаол ривожлантириб келмоқда.

Учрашув жараёнида томонлар Меморандумда белгиланган йўналишларни самарали амалга ошириш механизмларини муҳокама қилдилар. Кейинги босқичдаги ҳамкорликнинг устувор йўналишлари белгилаб олинди ва эришилган келишувлар икки томонлама манфаатли ҳамкорликни янада мустаҳкамлаши алоҳида таъкидланди.