Qirg‘iz Respublikasi Bosh prokuraturasi Yuridik akademiyasi bilan akademik hamkorlik mustahkamlanmoqda

Akademiya tashkil etilganining uch yilligi munosabati bilan o‘tkazilgan “Zamonaviy chaqiriqlar sharoitida qonun ustuvorligini ta’minlash: muammo va yechimlar” mavzusidagi xalqaro ilmiy-amaliy konferensiya doirasida, shuningdek, O‘zbekiston Respublikasi Huquqni muhofaza qilish akademiyasi va Qirg‘iz Respublikasi Bosh prokuraturasi huzuridagi Yuridik akademiya o‘rtasida o‘zaro hamkorlik to‘g‘risidagi Memorandum imzolandi.

Mazkur hujjat ikki ta’lim muassasasi o‘rtasidagi do‘stona munosabatlarni rivojlantirishda muhim qadam bo‘lib, uzoq muddatli va barqaror hamkorlik uchun mustahkam asos yaratadi. Memorandum doirasida ilmiy-o‘quv salohiyatini mustahkamlash, o‘quv va tadqiqot yo‘nalishlarini kengaytirish, qo‘shma tashabbuslar va ilmiy-amaliy dasturlarni amalga oshirish, professor-o‘qituvchi hamda tinglovchi-talabalar o‘rtasida akademik almashinuvni yo‘lga qo‘yish, ilg‘or tajriba va eng yaxshi amaliyotlar bilan o‘zaro almashish kabi vazifalar belgilangan.

Qirg‘iz Respublikasi Bosh prokuraturasi huzuridagi Yuridik akademiya mamlakat huquqiy tizimi uchun yuqori malakali kadrlar tayyorlaydigan ixtisoslashtirilgan oliy ta’lim muassasasidir. Akademiya prokuratura, adliya, huquqni muhofaza qiluvchi va sud organlari uchun kadrlar tayyorlash tizimini takomillashtirishga qaratilgan. Unda prokurorlik va sud faoliyati, yurisprudensiya, sud ekspertizasi, axborot xavfsizligi kabi yo‘nalishlarda oliy va baynalminal ta’lim dasturlari amalga oshiriladi. Shuningdek, Akademiya xalqaro ta’lim va ilmiy maqomga ega turli tashkilotlar bilan xalqaro hamkorlikni faol rivojlantirib kelmoqda.

Uchrashuv jarayonida tomonlar Memorandumda belgilangan yo‘nalishlarni samarali amalga oshirish mexanizmlarini muhokama qildilar. Keyingi bosqichdagi hamkorlikning ustuvor yo‘nalishlari belgilab olindi va erishilgan kelishuvlar ikki tomonlama manfaatli hamkorlikni yanada mustahkamlashi alohida ta’kidlandi.