“Қалқон”: Академия жамоаси пойтахт ОТМлари орасида энг кучли деб топилди

«Конституция – инсон қадри, эркинлик, тенглик ва адолат гарови!» шиори остида Тошкент шаҳрида пойтахтнинг тўққизта олий таълим муассасаси жамоалари ўртасида “Қалқон” спорт турнири бўлиб ўтди.

Мазкур мусобақа Ўзбекистон Республикаси Ҳуқуқни муҳофаза қилиш академияси ва Жаҳон иқтисодиёти ва дипломатия университети ташаббуси билан ташкил этилган бўлиб, унинг асосий мақсади ёшлар ўртасида соғлом турмуш тарзини оммалаштириш, жисмоний тайёргарликни мустаҳкамлаш ҳамда талаба-ёшлар онгига Конституция қадриятларини сингдиришдан иборат бўлди.

Мусобақа Низоми талабларига мувофиқ, иштирокчилар турникда машқ бажариш, гиря кўтариш, армрестлинг, АК–74 ва Макаров пистолетини тўғри йиғиш ва тарқатиш, шунингдек, арқон тортиш йўналишларида ўз маҳоратларини намойиш этдилар. Барча босқичларда куч, матонат, жамоавий ҳамкорлик ва ҳарбий–амалий тайёргарлик элементларини ўзлаштириш муҳим аҳамият касб этди.

Ҳуқуқни муҳофаза қилиш академиясининг “Қалқон” жамоаси алоҳида йўналишларда учта биринчи ва иккита учинчи ўринни қўлга киритиб, юқори тайёргарлик даражасини яққол намойиш этди.
Энг муҳими, умумжамоавий ҳисобда Академия жамоаси 1-ўринни эгаллаб, турнирнинг мутлақ ғолиби бўлди.

Умумжамоавий ҳисобда 1-, 2- ва 3-ўринларни эгаллаган ОТМ жамоалари кубок ва эсдалик совғалар билан тақдирланади.

Мусобақанинг ўтказилиши талаба ёшларнинг жисмоний ва ҳарбий–амалий тайёргарлигини оширишга, уларни Конституциямизда мустаҳкамланган адолат, эркинлик ва масъулият ғоялари руҳида тарбиялашга хизмат қилади.