Халқаро коррупцияга қарши курашиш куни муносабати билан Миллий банкда семинар ўтказилди

Академия томонидан Халқаро коррупцияга қарши курашиш куни муносабати билан Ташқи иқтисодий фаолият Миллий банки билан ҳамкорликда банкнинг ёш ходимлари иштирокида коррупцияга қарши курашиш мавзусида ўқув семинари семинари ташкил этилди.

Аралаш тарзда ўтказилган семинарда банкнинг марказий маҳкамаси ва барча ҳудудий тузилмаларининг ишга янги қабул қилинган 500 нафарга яқин ёш ходимлари иштирок этди.

Тадбирда Академиянинг Коррупцияга қарши курашиш илмий-таълим маркази бошлиғи Х.Турсунбеков Миллий банк билан ҳар йили анъанавий тарзда ташкил этилаётган коррупцияга қарши курашиш тадбирлари аҳамияти, мамлакатимизда давлат органлари ва ташкилотлари хизматчиларининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш борасида амалга оширилаётган чора-тадбирлар, Академия томонидан бу борада “Коррупцияга қарши курашиш виртуал академияси” электрон платформаси орқали ходимларнинг малакасини ошириш фаолияти ва натижалари, келгусидаги режалар хусусидаги тақдимот билан чиқиш қилди.

Ўқув семинари Миллий банк тизимига ишга кирган ёш ходимларнинг коррупцияга қарши курашиш соҳасидаги хабардорлигини оширишга, уларда Академия томонидан коррупцияга қарши курашиш соҳасидаги фаолияти билан яқиндан танишишга имкон берди.