“Суд нотиқлиги ва юристнинг нутқ одоби” мавзусида инновацион семинар машғулоти ўтказилди

Ҳуқуқни муҳофаза қилиш академиясида ўтказилаётган “Инновацион дарслар ойлиги” доирасида “Суд нотиқлиги. Юристнинг нутқ одоби” мавзусида амалий ва назарий жиҳатдан бой дастур асосида семинар машғулоти ташкил этилди.

Мазкур машғулот “Касбий ва нутқ маданияти” фанининг назарий ва амалий асосларини чуқур ўрганиш, юристларнинг нутқ маданиятини такомиллаштириш, судда ва хизмат фаолиятида самарали мулоқот олиб бориш кўникмаларини шакллантириш, шунингдек ёш мутахассисларда нутқий маданиятга масъулиятли ёндашувни тарбиялашга қаратилди.

Дарс замонавий педагогик технологиялар асосида интерактив тарзда ташкил этилган бўлиб, машғулот бошида мавзунинг мақсад ва ўқув натижалари, ўзлаштирилиши лозим бўлган компетенциялар тушунтирилди. Талабаларга суд нотиқлигининг назарий асослари, юрист нутқининг таркибий унсурлари, нутқ маданиятининг ҳуқуқни муҳофаза қилиш соҳасида тутган ўрни ва аҳамияти ҳақида маълумот берилди.

Блиц савол-жавоб ва интерактив тестлар ёрдамида талабаларнинг аввалги билимлари фаоллаштирилиб, мулоҳаза юритиш жараёни рағбатлантирилди.

Семинарнинг амалий қисми гуруҳларда ишлаш, диққатни жамлаш машқлари, нутқ техникасини намойиш этиш, мураккаб профессионал вазиятларда тўғри ва ишончли нутқ билан чиқиш қилиш каби топшириқлар орқали талабаларнинг амалий кўникмаларини мустаҳкамлашга қаратилди. Машғулот давомида талабалар ўз ижодий ёндашувини кўрсатиш, суд нутқининг қисқа фрагментларини тайёрлаш ва уларни аудитория олдида тақдим этиш имкониятига эга бўлдилар.

Академияда “Инновацион дарслар ойлиги” доирасида бундай семинарларнинг изчил давом эттирилиши ўқув жараёнини такомиллаштириш, профессор-ўқитувчиларнинг илғор педагогик тажрибаларини оммалаштириш, таълимда замонавий ёндашувларни кенг жорий этиш ва юристлар тайёрлаш сифатига ижобий таъсир кўрсатиши билан аҳамиятлидир.