Терроризмни молиялаштиришга қарши курашиш соҳасида халқаро семинар ўтказилди

Ўзбекистон Республикаси Ҳуқуқни муҳофаза қилиш академиясида терроризмни молиялаштиришга қарши курашиш соҳасида молиявий разведка бўлинмалари ва ҳуқуқни муҳофаза қилувчи органлар ўртасидаги ҳамкорликни мустаҳкамлашга қаратилган икки кунлик халқаро семинар бўлиб ўтди.

Семинар МДҲ Молиявий разведка бўлинмалари раҳбарларининг Кенгаши (СРПФР), МДҲ Аксилтеррор маркази (АТЦ СНГ), Жиноий даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳи (ЕАГ) ва Молиявий мониторинг бўйича халқаро ўқув-методик маркази (МУМЦФМ) билан ҳамкорликда ташкил этилган.

Тадбирда Озарбайжон, Беларусь, Қозоғистон, Россия, Қирғизистон, Тожикистон, Туркманистон ва Ўзбекистоннинг молиявий разведка бўлинмалари ҳамда ҳуқуқни муҳофаза қилувчи органлари ходимлари, шунингдек СРПФР, АТЦ СНГ, ЕАГ, МУМЦФМ каби халқаро ва минтақавий тузилмалар ҳамда Ҳуқуқни муҳофаза қилиш академиясининг вакиллари иштирок этди.

Семинар доирасида иштирокчи-давлатларнинг ҳудудларида террорчилик гуруҳларнинг фаолиятини молиялаштириш тенденциялари ва долзарб амалиётлари ҳамда пул маблағларни йиғиш ва ҳаракатлантиришнинг замонавий технологиялари устидан назоратни амалга оширишга доир ФАТФнинг стандартларини имплементация қилиш, «Даркнет» тармоқларида ва крипто-активлардан фойдаланиб содир этилаётган терроризмни молиялаштиришга қарши курашиш тажрибаси тўғрисида маълумот тақдим этилди.

Иштирокчилар учун ўтказилган амалий ролли ўйинлар давомида террорчи гуруҳлар томонидан пул маблағларини йиғиш ва кўчириш усулларини аниқлаш, ҳужжатлаштириш ва тергов қилиш бўйича идоралараро ҳамкорлик механизмлари ишлаб чиқилди, бу ўз навбатида семинарнинг  амалий натижадорлигини оширди.

Икки кунлик халқаро семинар ўтказилиши терроризмни молиялаштиришга қарши курашиш соҳасида тажриба алмашиш, иштирокчиларнинг касбий салоҳиятини ошириш ва ҳамкорликни мустаҳкамлашга хизмат қилади.