Илмий изланишдан таҳлилгача: магистрантлар халқаро маълумотлар базалари билан ишлашни ўзлаштирмоқда

Ўзбекистон Республикаси Ҳуқуқни муҳофаза қилиш академиясида магистратура тингловчилари учун «Илмий маълумотларни излаш ва таҳлил қилиш: EBSCO ва етакчи халқаро маълумотлар базаларининг имкониятлари» мавзусида ўқув-амалий семинар ташкил этилди.

Семинарнинг асосий мақсади магистратура тингловчиларининг илмий-тадқиқот фаолиятида замонавий ахборот ресурсларидан самарали фойдаланиш кўникмаларини шакллантириш, халқаро илмий маълумотлар базалари билан ишлаш бўйича амалий билимларини оширишдан иборат бўлди.

Тадбирда эксперт сифатида «E-Line Press» МЧЖ вакили Ф.Т.Шодмонова иштирок этиб, илмий манбаларни қидириш, таҳлил қилиш ва тўғри фойдаланиш масалалари бўйича батафсил маълумот берди.

Семинар давомида иштирокчилар Web of Science, Znanium, шунингдек Россия университетларининг энг йирик илмий ахборот платформаларидан бири ҳисобланган «Кенг тармоқли тўғридан-тўғри электрон консорциуми» (СЭБ) маълумотлар базаларининг имкониятлари, улардан фойдаланиш тартиби ҳамда илмий тадқиқотларда қўллаш усуллари билан танишдилар.

Тадбир интерактив форматда ўтиб, магистратура тингловчилари ўзларини қизиқтирган саволлар бўйича атрофлича жавоблар олдилар. Семинар илмий тадқиқот ишларининг сифатини ошириш, таҳлилий фикрлашни ривожлантириш ҳамда халқаро илмий маконга интеграциялашувни кучайтиришга хизмат қилади.