Тажриба алмашинуви ва янги ташаббуслар: Япония Адлия вазирлиги Институти делегациясининг Академияга ташрифи

Ўзбекистон Республикаси Ҳуқуқни муҳофаза қилиш академиясида Япония Адлия вазирлиги ҳузуридаги Тадқиқотлар ва малака ошириш институти делегацияси билан учрашув бўлиб ўтди.

Учрашув давомида меҳмонларга Академия фаолиятининг асосий йўналишлари, унинг ташкилий тузилмаси, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими ҳақида батафсил маълумот берилди. Шунингдек, таълим ва илмий-тадқиқот жараёнига алоҳида эътибор қаратилди.

Музокаралар чоғида касбий тажриба алмашинуви ва ҳамкорликни янада ривожлантиришнинг эҳтимолий йўналишлари масалалари асосий ўринни эгаллади. Томонлар қўшма илмий-тадқиқот лойиҳалари ва таълим дастурларини амалга ошириш, шунингдек ўзаро манфаатли янги ташаббусларни қўллаб-қувватлаш истиқболларини муҳокама қилдилар.

Бундан ташқари, ташриф доирасида делегация аъзолари Академиянинг моддий-техника базаси, ихтисослаштирилган ўқув аудиториялари ва илмий лабораториялари билан танишдилар. Таълим жараёнига жорий этилган замонавий ва инновацион ёндашувлар япон томони вакилларида катта қизиқиш уйғотди.