Хотира ва фахр: Қуролли Кучлар музейига ташриф 

Ватан ҳимоячилари кунига бағишланган тадбирлар доирасида Ҳуқуқни муҳофаза қилиш академияси бакалавриатининг биринчи курс талабалари Ўзбекистон Республикаси Қуролли Кучлари Давлат музейига ташриф буюрдилар.

Мазкур ташрифдан кўзланган асосий мақсад талабаларда ҳарбий-ватанпарварлик руҳини шакллантириш, миллий армия тарихи ва унга бўлган ҳурматни юксалтириш, шунингдек мамлакатимизда мудофаа ва хавфсизлик соҳаларида амалга оширилаётган жараёнлар ҳақида кенг тасаввур ҳосил қилишдан иборат бўлди.

Музейда талабалар Ўзбекистон Республикаси Қуролли Кучларининг ташкил топиши ва ривожланиш тарихи, эришилган ютуқлар ҳамда миллий хавфсизликни таъминлашдаги ўрни билан танишдилар. Шунингдек, замонавий ҳарбий техника, қурол-яроғлар ва махсус воситаларга бағишланган экспозициялар талабаларда катта қизиқиш уйғотди.

Тадбир доирасида «Миллий армия – менинг фахрим ва ифтихорим!» шиори остида Фахрийлар кенгаши вакиллари – катта хизмат ва ҳаётий тажрибага эга, йиллар давомида миллий армия сафларида турли лавозимларда хизмат қилган офицерлар билан учрашув ҳам ташкил этилди. Учрашув давомида улар ҳарбий хизмат тажрибалари, касбий масъулият ва Ватанга садоқат ҳақида сўзлаб бердилар ҳамда талабаларни қизиқтирган саволларга жавоб қайтардилар.

Талабаларда ватанпарварлик туйғусини мустаҳкамлаш, миллий армияга бўлган ҳурматни ошириш ва фуқаролик масъулиятини шакллантиришга қаратилган бундай маънавий-маърифий тадбирларни Академияда келгусида ҳам тизимли ва доимий равишда ташкил этиш режалаштирилган.