Ватанпарварлик тарбияси ва касбий тайёргарлик: Академияда тематик тадбирлар туркуми давом этмоқда

Академияда Ўзбекистон Республикаси Қуролли Кучлари ташкил этилганининг 34 йиллиги ҳамда 14 январь – Ватан ҳимоячилари кунига бағишланган ватанпарварлик тадбирлари туркуми доирасида талабаларда ватанпарварлик руҳини мустаҳкамлаш, Ватанга муҳаббат ва мамлакатимизда амалга оширилаётган кенг кўламли ижтимоий-сиёсий ҳамда иқтисодий жараёнларга дахлдорлик ҳиссини шакллантириш, шунингдек уларнинг касбий билим ва кўникмаларини мустаҳкамлаш ҳамда келгуси хизмат фаолиятига тайёргарлигини оширишга қаратилган навбатдаги тадбир бўлиб ўтди.

Тадбир «Миллий армия – Она юрт қалқони, тинчлигимиз посбони!» шиори остида ўтказилди.

Тадбирнинг очилиш маросими доирасида Мудофаа вазирлиги ҳарбий оркестри ва фахрий қоровул бўлинмаси ўз касбий маҳоратларини намойиш этди ҳамда иштирокчиларда катта қизиқиш уйғотди.

Тадбирнинг асосий ва амалий қисмларида Мудофаа вазирлиги ҳамда Ички ишлар вазирлигининг махсус бўлинмалари томонидан қўл жанги элементлари кўрсатиб берилди, шунингдек мамлакатимиз куч тузилмалари ва ҳуқуқни муҳофаза қилиш органлари тасарруфидаги замонавий қурол-яроғлар кўргазмаси ташкил этилди. Бундан ташқари, оператив-қидирув ва тергов фаолиятида қўлланиладиган криминалистика техникаси ҳамда махсус воситалар намуналари тақдим этилди.

Талабалар ҳар бир қурол, махсус ускуна ва воситанинг вазифалари, тактик-техник хусусиятлари, ишлаш тамойиллари билан бевосита танишиб, мутахассислардан ўзларини қизиқтирган саволларга атрофлича жавоб олдилар.

Тадбир якунида талабалар ўртасида Макаров пистолетини нотўлиқ қисмларга ажратиш ва йиғиш, шунингдек бошқа йўналишлар бўйича ўтказилган мусобақа ва эстафеталарда ғолиб бўлган талаба ва жамоалар тақдирландилар.