Ҳуқуқни муҳофаза қилиш академиясида бакалавриатнинг «Прокурорлик фаолияти» таълим йўналиши талабалари билан прокуратура органлари фахрийлари – ўз умрини қонун устуворлиги ва ҳуқуқ-тартиботни мустаҳкамлашга бағишлаган генераллар иштирокида учрашув бўлиб ўтди.

Тадбирда Ўзбекистон Республикаси Бош прокуратураси ҳузуридаги Фахрийларни ижтимоий қўллаб-қувватлаш жамоат маркази раиси, юридик фанлар номзоди, генерал-майор Ботир Ҳамзаевич Калонов, прокуратура фахрийси, юридик фанлар номзоди, генерал-лейтенант Тоҳир Қамбарович Мирзаев, Марказий Осиё сунъий интеллект ассоциацияси раиси маслаҳатчиси, юридик фанлар номзоди, генерал-майор Эркин Меҳмонович Абзалов, Академия профессори, юридик фанлар доктори, профессор, генерал-майор Бахтиёр Халилович Пўлатов иштирок этдилар.

Мазкур тадбир авлодлар ўртасидаги узвийликни мустаҳкамлаш, прокурорлик хизматига нисбатан ҳурмат руҳини шакллантириш ҳамда бўлажак юристларда прокуратуранинг қонун устуворлигини таъминлаш, инсон ҳуқуқ ва эркинликлари ҳамда қонуний манфаатларини ишончли ҳимоя қилишга қаратилган замонавий институционал ўрни ҳақидаги тушунчани янада чуқурлаштиришга қаратилди.

Учрашув давомида фахрийлар Ўзбекистон Республикаси прокуратураси фаолиятини ташкил этишнинг тарихий босқичлари, унинг ривожланиш асослари, шунингдек мамлакатимизда қонун устуворлигини таъминлашга қаратилган кенг қамровли ислоҳотлар ва уларнинг мазмун-моҳияти ҳақида фикр юритдилар. Меҳмонлар ўз касбий ва ҳаётий тажрибалари билан ўртоқлашиб, прокуратура органларининг шаклланиш жараёни, хизмат масъулиятининг ўзига хос жиҳатлари ҳамда қонунийлик, адолат ва касбий этика тамойилларининг кундалик фаолиятдаги аҳамиятини таъкидладилар.

Шунингдек, сўнгги йилларда амалга оширилаётган ислоҳотлар натижасида прокуратура органларида кечаётган институционал трансформациялар, йилдан-йилга юкланаётган вазифалар ҳамда ташкил этилаётган янги ташкилий тузилмалар хусусида алоҳида тўхталиб ўтилди.

Учрашувда мамлакатимизда қонунларнинг аниқ ва бир хилда ижро этилишини таъминлашда прокурор назоратининг ўрни, айниқса, прокурорлик назорати самарадорлиги расмий статистик кўрсаткичлар билан эмас, балки фуқароларнинг бузилган ҳуқуқларини тиклаш ва ҳуқуқбузарликларнинг олдини олишга қаратилган аниқ натижалар билан баҳоланиши алоҳида таъкидланди.

Меҳмонлар талабаларни доимий билим излашга, илмий тафаккурни ривожлантиришга, касбий фаолиятда масъулият ва матонатни уйғунлаштирган ҳолда, ҳуқуқни муҳофаза қилиш соҳасидаги мураккаб хавф-хатарларга тайёр бўлган етук мутахассис сифатида шаклланишга ундадилар.

Талабалар меҳмонларнинг чиқишларига катта қизиқиш билдириб, хизматнинг амалий жиҳатлари, касбий танлов ҳамда жамият эҳтиёжлари ва фуқаролар ишончига йўналтирилган фаолият учун зарур бўлган шахсий фазилатлар хусусида саволлар бердилар. Мулоқот очиқ ва мазмунли руҳда ўтди.

Ушбу учрашув Академияда олиб борилаётган таълим-тарбия ишларининг муҳим таркибий қисми сифатида, бўлажак мутахассисларда юксак ҳуқуқий маданият, масъулият ҳисси ҳамда прокурорлик хизматининг қонунга ва инсон ҳуқуқларини ҳимоя қилишга қаратилган хизмат миссиясини англашни шакллантиришга хизмат қилди.