Китоб касбий тафаккур пойдевори сифатида: Академия талабалари билан детектив ёзувчи учрашуви

Ҳуқуқни муҳофаза қилиш академиясида талабалар, тингловчилар ва ходимлар ўртасида китобхонлик маданиятини юксалтириш, маънавий-маърифий дунёқарашни кенгайтириш ҳамда касбий тафаккурни ривожлантиришга қаратилган тизимли фаолият доирасида Ёзувчилар уюшмаси аъзоси, қатор детектив асарлар муаллифи Комил Синдоров иштирокида маънавий-маърифий тадбир ташкил этилди.

Тадбир давомида Комил Синдоров аниқ фактлар ва шахсий кузатувларига асосланган маъруза билан иштирок этиб, ижодий фаолияти, ёзувчилик тажрибаси ҳамда адабий асарларда ҳаётий ҳақиқатни ифодалаш масалаларига алоҳида эътибор қаратди. Ёзувчининг асарлари ортиқча пафос ва сунъий уйдирмалардан холи бўлиб, реал воқеликка суянган мазмуни билан ажралиб туради.

Муаллиф қаламига мансуб китоблар ўзаро мантиқий изчилликка эга бўлиб, бири иккинчисининг давоми сифатида мутолаа қилинади. Бугунги кунда ушбу асарлар ўз ўқувчисига эга бўлган адабий туркум сифатида шаклланиб улгурган. Ёзувчининг соҳавий билим ва амалий тажрибаси асарлар мазмунида яққол акс этиб, китобхонга муаллифнинг мавзуга чуқур ва касбий ёндашувини англаш имконини беради.

Мазкур маънавий-маърифий тадбир талабаларда китобхонлик ва китоб билан ишлаш маданиятини шакллантириш, таҳлилий фикрлаш қобилиятини ривожлантириш, шунингдек, келгусида тергов фаолиятида зарур бўладиган касбий компетенциялар ва амалий кўникмаларни мустаҳкамлашга хизмат қилади.