Академияда очиқ эшиклар куни: магистратурани онгли танлаш

Ҳуқуқни муҳофаза қилиш академияси томонидан жамоатчилик, хусусан, олий юридик таълим муассасалари битирувчилари учун мунтазам равишда очиқ ва таништирув тадбирлари ташкил этиб келинмоқда. Ана шундай тадбирлардан бири Академияда ўтказилган навбатдаги Очиқ эшиклар куни бўлди.

Мазкур тадбир Тошкент давлат юридик университети, Жаҳон иқтисодиёти ва дипломатия университети битирувчи курс талабалари, шунингдек, Ички ишлар вазирлиги Академияси ва Жамоат хавфсизлиги университети курсантлари учун ташкил этилди. Тадбирда Ҳуқуқни муҳофаза қилиш академиясининг магистратура таълим йўналишлари асосий эътибор марказида бўлди.

Тадбир доирасида иштирокчилар учун тақдимот ўтказилиб, Академия магистратурасида таълим жараёнини ташкил этиш, ўқув дастурларининг мазмуни, илмий-амалий йўналтирилган тайёргарлик тизими ҳамда магистрларни тайёрлашда қўлланилаётган замонавий ёндашувлар ҳақида батафсил маълумот берилди.

Шунингдек, тадбир иштирокчилари Академиянинг ўқув бинолари билан яқиндан танишиб, замонавий таълим инфратузилмаси имкониятларини кўздан кечирдилар. Улар Ахборот-ресурс маркази, coworking ҳудуди, амалий ва симуляция машғулотларини ўтказиш учун махсус жиҳозланган аудиториялар, полигонлар, лабораториялар амалий ва вазиятли машғулотлар ўтказиш учун махсус жиҳозланган хоналар фаолияти билан танишдилар.

Тадбир давомида масъул ходимлар томонидан магистратурада таълим олиш шартлари, қабул жараёнларини ташкил этиш тартиби, шунингдек, тингловчилар учун яратилган таълимий ва илмий имкониятлар юзасидан атрофлича тушунтиришлар берилди. Иштирокчилар томонидан билдирилган барча саволларга тўлиқ ва асосли жавоблар қайтарилди.