Профессор-ўқитувчиларнинг педагогик маҳоратини ошириш бўйича навбатдаги семинар-тренинг

Ҳуқуқни муҳофаза қилиш академиясида профессор-ўқитувчиларнинг педагогик маҳоратини ошириш, таълим жараёнига инновацион технологиялар ва замонавий методикаларни жорий этишга қаратилган ишлар изчил ва тизимли давом эттирилмоқда.

Мазкур фаолият доирасида Олий таълим, фан ва инновациялар вазирлиги ҳузуридаги Касбий таълим агентлиги тасарруфидаги Касбий таълимни ривожлантириш институтининг кафедра профессори, п.ф.д. Д.Рахматуллаева ҳамда мазкур кафедра доценти, п.ф.ф.д. Н.Розиқова иштирокида “Масофавий ўқитишда рақамли инструментлардан фойдаланиш” мавзусида навбатдаги семинар-тренинг ташкил этилди.

Семинар-тренинг давомида таълим тизимида рақамлаштириш жараёнларининг аҳамияти ва зарурияти, таълим жараёнида қўлланиладиган рақамли воситаларнинг турлари, функциялари ва дидактик имкониятлари, шунингдек рақамли инструментларни таълим мақсадлари ҳамда таҳсил олувчилар эҳтиёжларига мос ҳолда танлаш ва қўллаш усуллари юзасидан атрофлича маълумотлар берилди.

Тренингнинг амалий қисмида иштирокчилар фаол қатнашиб, “Wordwall”, “Kahoot”, “AhaSlides”, “Mentimeter” каби интерактив таълим платформалари, шунингдек “Padlet” онлайн доскасидан фойдаланиш бўйича амалий машқларни бажардилар.

Семинар-тренинг якунида мавзу юзасидан иштирокчиларни қизиқтирган саволларга батафсил жавоблар берилди ҳамда рақамли воситаларни таълим жараёнига самарали жорий этиш бўйича тавсиялар билдирилди.