Рақамли ривожланиш ва китобхонлик: Академия ва “E-LINE press” ўртасидаги ҳамкорликнинг янги босқичи

Ўзбекистон Республикаси Президентининг 2025 йил 3 ноябрдаги “Рақамли прокуратура 2030 стратегиясини тасдиқлаш ва уни самарали амалга ошириш чора-тадбирлари тўғрисида”ги ПФ-204-сонли Фармони ва 2026 йил 15 январдаги “Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги ПҚ-9-сонли Қарори ижроси юзасидан Академия томонидан изчил тадбирлар ўтказилмоқда.

Академия кутубхонасини рақамлаштириш жараёнларини чуқурлаштириш, шунингдек, Академия нашрлари нуфузини янада ошириш билан боғлиқ масалалар юзасидан Академия бошлиғининг ўринбосари А.Одинаев бошчилигида “E-LINE press” компанияси вакиллари билан ишчи амалий учрашуви ўтказилди.

Учрашув давомида Академияда ахборот ресурслари кўламини кенгайтириш, кутубхона фаолиятига замонавий технологик ускуна ва воситаларни жорий этиш, ахборот ресурсларидан фойдаланишда сунъий интеллект технологияларини қўллаш, жумладан, фойдаланувчиларга инсон омилисиз хизмат кўрсатиш, шунингдек, даврий нашрларни халқаро индексация қилинишини таъминлаш ва бошқа соҳаларда ўзаро ҳамкорлик имкониятлари муҳокама қилинди.

Музокара натижасига кўра, ҳамкорликнинг истиқболлари, йўналишлари вазифа ва муддатлар ҳақида келишиб олинди.

Мазкур учрашув Академиянинг ушбу соҳасидаги фаолиятига инновацион технологияларни жорий этилишини жадаллаштириш ва кенгайтириш, талабалар ва ходимларга адабиёт ва бошқа ресурслардан фойдаланишни янада қулайтиришни таъминлашга қаратилган навбатдаги қадамлардан бири ҳисобланади.