Жаҳолатга қарши курашишда маърифатнинг ўрни: ёшлар билан маънавий-маърифий мулоқот

Ҳуқуқни муҳофаза қилиш академиясида ёшларни маънавий баркамоллик, танқидий фикрлаш ва онгли фуқаролик руҳида тарбиялаш мақсадида маънавий-маърифий тадбирлар тизимли равишда ўтказиб келинмоқда.

Шу фаолият доирасида “Жаҳолатга қарши маърифат” шиори остида маънавий-маърифий давра суҳбати ташкил этилди. Тадбирда Республика Маънавият ва маърифат маркази ҳузуридаги Маърифат тарғиботчилари жамияти бўлим бошлиғи М.Намозова, соҳа мутахассислари, шунингдек, академия ходимлари ва талабалари иштирок этди.

Давра суҳбатида жаҳолат, радикализм, мутаассиблик ва асоссиз ахборотларнинг жамият тараққиётига салбий таъсири, шунингдек, уларга қарши маърифат ва билим асосида курашишнинг долзарблиги атрофлича муҳокама қилинди.

Тадбир давомида маърузалар, очиқ мулоқотлар ҳамда савол-жавоблар ташкил этилиб, иштирокчиларга ахборотни таҳлил қилиш, танқидий фикрлаш ва тўғри хулоса чиқариш кўникмаларини шакллантиришга қаратилган амалий тавсиялар берилди. Шунингдек, миллий ва умуминсоний қадриятлар, ўзаро ҳурмат, ҳамжиҳатлик ва тинчлик ғояларини тарғиб этишга алоҳида эътибор қаратилди.

Бу каби тадбирлар ёшларнинг маънавий иммунитетини мустаҳкамлаш, уларни ёт ғоялар таъсиридан асраш ҳамда жамиятда соғлом маънавий муҳитни қарор топтиришга хизмат қилади. Тадбир якунида иштирокчилар томонидан мавзу юзасидан фикр-мулоҳазалар билдирилиб, ушбу йўналишдаги маънавий-маърифий ишларни келгусида янада тизимли ва самарали давом эттириш зарурлиги таъкидланди.