Ҳуқуқни муҳофаза қилиш академияси бакалавриати талабалари давлат стипендиялари ғолиблари бўлишди

2025/2026 ўқув йили учун олий таълим муассасаларининг бакалавриат босқичи талабалари ўртасида ўтказилган Президент ва номли давлат стипендиялари танлови якунлари эълон қилинди.

Танлов натижаларига кўра, Ҳуқуқни муҳофаза қилиш академиясининг “Тергов фаолияти” таълим йўналиши 3-босқич талабаси Ғаниев Хуршид Ёқубжон ўғли Ўзбекистон Республикаси Президенти давлат стипендиясига, шунингдек, Академиянинг “Прокурорлик фаолияти” таълим йўналиши 3-босқич талабаси Қушмаков Расул Тошматжонович Ислом Каримов номли нуфузли давлат стипендиясига сазовор бўлди.

Мазкур ютуқлар талабаларнинг ўқишдаги юқори натижалари, илмий-тадқиқот фаолиятидаги фаоллиги ҳамда жамоат ишларидаги ташаббускор иштироки самараси сифатида эътироф этилди.

Давлат стипендияларига сазовор бўлиш талабаларнинг билим ва салоҳиятига берилган юксак баҳо бўлиб, уларнинг келгусида ҳуқуқни муҳофаза қилиш соҳасида етук мутахассис сифатида шаклланишига хизмат қилади.