Жиззах вилояти маҳаллаларида криминоген вазиятни илмий ёндашув асосида ўрганиш ишлари олиб борилмоқда

Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сон ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сон қарорлари ижросини таъминлаш мақсадида, Академия ишчи гуруҳи томонидан “илмий хулоса – тавсия – натижа” тамойили асосида ҳудудларга чиқилиб, маҳаллалардаги криминоген вазият комлекс ўрганилмоқда.

Жумладан, ишчи гуруҳ аъзолари Ҳуқуқни муҳофаза қилиш академиясига номма-ном бириктирилган Жиззах вилоятининг Жиззах шаҳри ва Ш.Рашидов, Бахмал, Ғаллаорол, Дўстлик, Зомин, Мирзачўл, Пахтакор туманларининг уч йилдан буён “қизил” тоифада қолаётган 16 та маҳалласига бориб, ҳуқуқбузарлик ва жиноятларни ўз вақтида аниқлаш ҳамда уларнинг олдини олиш масалалари илмий ёндашувлар асосида ўрганилди.

Ишчи гуруҳ томонидан мазкур маҳаллалардаги криминоген вазиятга таъсир этувчи сабаб ва омиллар, жиноят содир этилишига замин яратаётган шарт-шароитлар, ижтимоий-маиший муаммолар ҳамда профилактик ишлар ҳолати чуқур ўрганилди.

Шунингдек, маҳаллаларда хавфсиз муҳитни яратиш, ҳуқуқбузарликларнинг олдини олишга қаратилган кунлик ва муддатли тадбирлар самарадорлиги таҳлил қилиниб, мавжуд камчиликларни бартараф этиш бўйича амалий тавсиялар берилди.

Ўрганиш натижалари асосида аҳоли гавжум жойларда назорат тадбирларини кучайтириш, ҳуқуқий тарғибот ишларини фаоллаштириш, сайёр суд мажлислари ташкил этиш, виктимологик профилактика чораларини амалга ошириш ҳамда кибержиноятлардан жабрланиш хавфини камайтиришга қаратилган илмий асосланган таклифлар ишлаб чиқилди.

Мазкур таклиф ва тавсиялар умумлаштирилиб, келгусида криминоген вазиятни яхшилашга қаратилган йўл хариталарига киритиш учун масъулларга тақдим этилди.

Таъкидлаш жоизки, академия мутахассислари томонидан ҳудуддаги криминоген вазиятнинг кундалик таҳлили асосида ишлаб чиқилган таклифлари маҳаллаларда хавфсиз муҳитни яратиш ҳамда ҳуқуқбузарликларнинг олдини олиш тизими самарасининг юксалишига ўзининг ижобий ҳисса қўшмоқда.