Жиноят қонунчилигини такомиллаштириш бўйича ишлар давом этмоқда

Жиноят қонунчилигини такомиллаштириш борасида олиб борилаётган ишлар доирасида Бирлашган миллатлар ташкилоти Гиёҳвандлик ва жиноятчилик бўйича бошқармасининг (ГЖБ) Марказий Осиёдаги Ҳудудий ваколатхонаси кўмагида хорижий эксперт сифатида Қозоғистон, Қирғизистон ва бошқа давлатларнинг жиноят қонунчилигини такомиллаштиришда иштирок этиб келган Ҳуқуқий сиёсат тадқиқотлар Марказининг катта ҳуқуқий маслаҳатчиси Дмитрий Нурумов (Қозоғистон) жалб этилган.

Маълумот учун: Д.Нурумов юридик фанлари номзоди, Марказий Осиёда ҳуқуқий ислоҳотларнинг долзарб масалаларига бағишланган 20 та нашр ишларининг муаллифи, ЕХҲТ миллий озчилик масалалари бўйича Олий комиссарининг катта маслаҳатчиси лавозимида ишлаган (Гаага ш. Нидерландия).

Д.Нурумов ўз ташрифи давомида жорий йилнинг 27-29 декабрь кунлари Ўзбекистон Республикаси Жиноят кодексини ислоҳ қилиш, жумладан, жиноятларни таснифлаш, қилмишлар тоифасини киритиш, жазо тайинлаш, жиноятлар рецидиви ва такрорийлиги ҳамда жиноят қонунчилигининг бошқа институтлари масалаларида маслаҳатлар берди.

Ишчи гуруҳ аъзолари билан учрашув ташкил этилиб, унда жиноят қонунчилигини такомиллаштиришнинг назарий ва амалий жиҳатлари муҳокама қилинди.