Ўзбекистон Республикасининг «Коррупцияга қарши курашиш тўғрисида»ги Қонунига илмий-амалий шарҳ нашр этилди

Ўзбекистон Республикаси Ҳуқуқни муҳофаза қилиш академияси томонидан коррупцияга қарши курашиш соҳасидаги етакчи мутахассислардан иборат муаллифлар жамоаси билан биргаликда Ўзбекистон Республикасининг «Коррупцияга қарши курашиш тўғрисида»ги Қонунига илмий-амалий шарҳ нашр этилди.

Мазкур шарҳ қонунчилик ва ҳуқуқни қўллаш амалиётидаги сўнгги ўзгаришлар, коррупцияга қарши курашиш соҳасидаги халқаро стандартларни ҳисобга олган ҳолда, шунингдек, жамият ва давлат олдида турган ҳуқуқ-тартиботни мустаҳкамлаш ҳамда самарали бошқарувни таъминлаш соҳасидаги вазифаларни чуқур англаган ҳолда тайёрланган.

Илмий-амалий шарҳда Қонуннинг барча моддалари изчил таҳлил қилиниб, уларнинг юридик табиати очиб берилган ҳамда коррупцияга қарши курашиш фаолиятининг асосий йўналишлари бўйича амалий йўналтирилган тушунтиришлар келтирилган.

Шарҳ коррупцияга қарши сиёсатни амалда татбиқ этувчи мутахассислар учун муҳим йўриқнома бўлиши, шунингдек, коррупция таҳдидларига ҳуқуқий чоралар кўриш механизмлари билан қизиқувчи кенг китобхонлар оммаси учун асосий манба вазифасини ўташи кўзда тутилган.

Ушбу шарҳнинг мақсади Ўзбекистон Республикасининг “Коррупцияга қарши курашиш тўғрисида”ги Қонуни қоидаларини чуқур, тизимли ва амалий йўналтирилган таҳлил қилиш, унинг нормаларининг маъноси, мазмуни ва юридик табиатини очиб бериш, уларни халқаро стандартлар билан таққослаш, шунингдек, ҳуқуқни қўллаш амалиётида уларни қўллаш имкониятларини кўрсатишдан иборат.

Шарҳнинг ҳар бир бўлими асосий тушунчалар, механизмлар ва ҳуқуқий институтларнинг чуқур таҳлили билан таъминланган.

Мазкур шарҳ ўзида илмий таҳлил ва амалий тажрибани уйғунлаштирган бўлиб, коррупцияга қарши курашиш соҳасидаги мутахассислар, профессор-ўқитувчилар, докторантлар, мустақил изланувчилар, суд ва ҳуқуқни муҳофаза қилиш органлар ходимлари, тадқиқотчилар, коррупцияга қарши курашиш соҳасидаги экспертлар учун мўлжалланган.

Шарҳ коррупцияга қарши курашиш тўғрисидаги қонунчиликни бир хил ва асосли қўллашга кўмаклашиш, коррупцияга қарши курашиш сиёсати самарадорлигини ошириш ҳамда коррупцияга нисбатан муросасиз муносабат маданиятини шакллантиришга хизмат қилади.