Туман прокурорларининг ўринбосарлари учун малака ошириш курслари

Жорий йилнинг 29 декабрь куни туман (шаҳар) прокурорларининг ўринбосарлари учун тадбиркорлик ва инвестицияларни ҳуқуқий ҳимоя қилишга доир соҳавий фаолияти мавзусидаги малака ошириш курслари якунланди.

Курслар дастури тадбиркорлик ва инвестицияларни ҳуқуқий ҳимоя қилиш бўйича республикада амалга оширилаётган ислоҳотлар ва бу борада прокуратура органлари олдида турган долзарб вазифаларни атрофлича ўрганиш, мавжуд бўлган тизимли муаммо ва камчиликларни таҳлил қилиш асосида шакллантирилди.

Тадбиркорлик субъектларининг ҳуқуқ ва қонуний манфаатлари ҳамда инвестицияларни ҳуқуқий ҳимоя қилишда прокуратура органлари фаолияти самарадорлигини оширишга қаратилган ушбу курслар жараёнига Ўзбекистон савдо-саноат палатаси, Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳамда Адлия вазирлиги ҳузуридаги Давлат хизматлари агентлиги мутахассислари жалб қилинди. Машғулотларда пинборд, кичик гуруҳларда ишлаш, гуруҳ тақдимотлари ва кейс-стади каби интерфаол ўқитиш методларидан самарали фойдаланилди.

Курслар доирасида сайёр ўқув машғулотларига алоҳида эътибор қаратилиб, тингловчиларга жойларда тадбиркорлик ва инвестицияларни жалб қилиш соҳаси бўйича ижобий тажрибалар билан танишиш имконияти яратилди.

Ўқув курслари якунида тингловчиларга малака оширганлик тўғрисида сертификатлар топширилди.