Ўзбекистон Республикаси Ҳуқуқни муҳофаза қилиш академиясида таълим сифатини ошириш, назарий билимларни амалиёт билан уйғунлаштиришга қаратилган дуал таълим тизими изчил равишда амалга оширилмоқда.
Мазкур тизим доирасида Академия бакалавриати “Тергов фаолияти” таълим йўналишининг иккинчи ва учинчи курсларида таҳсил олаётган 429 нафар талаба Тошкент шаҳри ҳамда Тошкент вилоятидаги Ички ишлар органлари фаолиятини мувофиқлаштириш бошқармалари ҳузуридаги тергов бўлинмаларида дуал таълим машғулотларида иштирок этмоқда. Шунингдек, “Прокурорлик фаолияти” таълим йўналишида таҳсил олаётган 142 нафар талаба пойтахт ва Тошкент вилояти туман прокуратураларида амалий машғулотларни ўтамоқда.
Талабалар тажрибали прокурорлар ва терговчилар раҳбарлигида, шунингдек, Академиядан бириктирилган амалиёт раҳбарлари кўмагида амалий машғулотларда иштирок этиб, ўз касбий билим, кўникма ва малакаларини мустаҳкамлаб бормоқдалар.
Фуқаролар мурожаатларини қабул қилиш ва кўриб чиқиш, фуқаролар қабулини ташкил этиш, процессуал ҳужжатларни расмийлаштириш ва таҳлил қилиш, ҳодиса жойини кўздан кечириш, шунингдек, бошқа зарур процессуал ҳаракатларда бевосита иштирок этиш орқали талабаларнинг амалий тажрибаси ҳамда касбий салоҳияти изчил шакллантирилмоқда.