Ўзбекистон Республикаси Ҳуқуқни муҳофаза қилиш академиясида назария ва амалиёт уйғунлигига асосланган дуал таълим тизими изчил равишда жорий этилмоқда.
Дуал таълим тизимининг жойларда амалга оширилиши, талабаларнинг амалий тайёргарлик даражаси ҳамда улар учун яратилган шарт-шароитларни ўрганиш ва мазкур механизм самарадорлигини баҳолаш мақсадида Академия бошлиғининг биринчи ўринбосари Е.В.Коленко Тошкент шаҳрининг Юнусобод ва Олмазор туманларидаги тергов ва прокуратура бўлинмаларига ташриф буюриб, талабаларнинг амалий фаолияти билан танишди.
Ташриф давомида талабаларнинг процессуал фаолиятга жалб этилиши даражаси, тажрибали терговчи ва прокурорлар томонидан амалга оширилаётган устозлик тизими, шунингдек, Академия ва амалиёт бўлинмалари ўртасидаги ҳамкорлик механизмига алоҳида эътибор қаратилди.
Фуқаролар мурожаатларини кўриб чиқиш, процессуал ҳужжатларни тайёрлаш ва таҳлил қилиш, ҳодиса жойини кўздан кечириш ҳамда бошқа зарур процессуал ҳаракатларда иштирок этиш орқали талабаларда барқарор касбий компетенциялар ва мустақил хизмат фаолиятига тайёрлик шакллантирилаётгани таъкидланди.
Ташриф якунида дуал таълим тизимини янада такомиллаштириш ва унинг амалий самарадорлигини ошириш бўйича тегишли тавсиялар берилди.