Мустаҳкам ҳамкорликка йўл: Ҳарбий хавфсизлик ва мудофаа университети билан меморандум имзоланди

Ўзбекистон Республикаси Ҳуқуқни муҳофаза қилиш академиясида Ўзбекистон Республикаси Ҳарбий хавфсизлик ва мудофаа университети делегациясининг танишув ташрифи бўлиб ўтди.

Ташриф доирасида икки таълим муассасаси ўртасида ишчи учрашув ташкил этилди. Учрашув давомида томонлар таълим жараёнини такомиллаштириш, илмий-тадқиқот фаолиятини ривожлантириш, профессор-ўқитувчилар ва тингловчилар ўртасида тажриба алмашиш, шунингдек қўшма илмий ва амалий лойиҳаларни амалга ошириш истиқболларини муҳокама қилдилар.

Музокаралар жараёнида замонавий таълим технологияларини жорий этиш, амалий тайёргарлик самарадорлигини ошириш ҳамда хавфсизлик ва ҳуқуқни муҳофаза қилиш соҳасида кадрлар тайёрлаш сифатини янада такомиллаштириш масалаларига алоҳида эътибор қаратилди.

Учрашув якунида Ўзбекистон Республикаси Ҳуқуқни муҳофаза қилиш академияси ҳамда Ўзбекистон Республикаси Ҳарбий хавфсизлик ва мудофаа университети ўртасида таълим ва илмий-тадқиқот фаолияти соҳасида ҳамкорлик меморандуми имзоланди. Мазкур ҳужжат икки муассаса ўртасида ўзаро манфаатли ҳамкорликни янада кенгайтириш, қўшма таълим дастурлари ва илмий тадқиқотларни амалга ошириш учун мустаҳкам ҳуқуқий асос яратади.