Ҳуқуқни муҳофаза қилиш академиясида Глобал университетлар коалицияси ташаббуси доирасида SDG Action and Awareness Week – Барқарор ривожланиш мақсадлари (БРМ) бўйича ҳаракатлар ва хабардорлик глобал ҳафталиги ўтказилади. Тадбир БРМ ҳақида хабардорлик даражасини ошириш, барқарор фикрлаш маданиятини шакллантириш, экологик ва ижтимоий масъулиятни ривожлантириш ҳамда барқарор ривожланиш соҳасида амалий ҳаракатларни рағбатлантиришга қаратилган.
Ҳафталик доирасида БРМ мавзусига киришга оид ахборот сессияси ва ҳафталик расмий очилиш маросими, ҳуқуқни муҳофаза қилиш фаолиятида рақамли кўникмалар, атроф-муҳитни муҳофаза қилиш, соғлом овқатланиш, эрта никоҳ ва бошқа долзарб мавзуларга бағишланган семинар ва давра суҳбатлари ўтказилади. Шунингдек, ҳафталик доирасида дебат, плоггинг ва буккроссинг акциялари, инновацион ғоялар ва стартаплар танлови ҳамда тақдимоти, шунингдек БРМ бўйича иншолар ва постерлар танловлари ташкил этилади.
Ҳафталик якунида ғолиблар ва фаол иштирокчиларни турли номинациялар бўйича тақдирлаш, шунингдек сертификатлар топшириш режалаштирилган.
Мазкур ҳафталик Академияда барқарор ривожланиш ғояларини тарғиб қилиш, ёшларнинг экологик ва ижтимоий масъулиятини мустаҳкамлаш ҳамда Барқарор ривожланиш мақсадларига эришишга қаратилган ташаббусларни қўллаб-қувватлашга хизмат қилади.
Барча қизиқувчиларни ҳафталик доирасидаги тадбирларда фаол иштирок этишга чақириб қоламиз.