Жамоат хавфсизлигини таъминлашда давлат органлари ва жамоатчилик тузилмаларининг фаолиятини мувофиқлаштириш масалалари муҳокама қилинди

Жорий йилнинг 5 январь куни Тошкент шаҳар Чилонзор туман прокуратурасида Академиянинг Жиноятларнинг содир этилиши сабабларини тизимли таҳлил қилиш ва ўрганиш маркази ходимлари томонидан туман ҳуқуқни муҳофаза қилувчи идоралари ҳамда кенг жамоатчилик иштирокида жамоат хавфсизлигини таъминлаш соҳасида давлат органлари, ташкилотлар ва жамоатчилик тузилмаларининг фаолияти ташкил этилиши ва мувофиқлаштирилишини таъминлаш бўйича йиғилиш ўтказилди.

Мазкур тадбир Ўзбекистон Республикаси Президентининг 2018 йил 24 декабрдаги «Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида»ги ПҚ-4075-сонли Қарорига асосан жамоат хавфсизлигини таъминлашда прокуратура органлари олдига қўйилган янги вазифаларнинг ижросини таъминлаш мақсадида ташкиллаштирилди.

Йиғилишда туман прокуратураси, ички ишлар, соғлиқни сақлаш, бандлик ва меҳнат муносабатлари, таълим органлари, хотин-қизлар қўмитаси, ўзини-ўзи бошқариш органлари, “Нуроний” жамғармаси, Ёшлар иттифоқи ва диний соҳа вакиллари иштирок этди.

Йиғилиш иштирокчилари тумандаги жиноятчилик ҳолатини муҳокама қилиб, жиноятларни олдини олиш ва унга қарши курашиш ҳамда жамоат хавфсизлигини таъминлаш механизмлари, жиноий-ҳуқуқий статистикани юритиш ва жиноятларни таҳлил қилиш жараёни, ҳуқуқбузарликлар профилактикаси юзасидан батафсил маълумот олишди.

Тадбир  жараёнида диний соҳа вакилларининг муқаддам судланган  ҳамда ҳуқуқбузарликлар содир этишга мойил бўлган шахслар билан тарбиявий ишлар олиб боришлари, фуқароларга қонунга ҳурмат ва қонун бузилишининг ҳар қандай кўринишига муросасизлик муносабатини сингдириш, миллий ва умуминсоний қадриятларга ҳурмат руҳида тарбиялаш масалаларига алоҳида эътибор қаратилди.

Бундан ташқари, жамоат хавфсизлиги фаолиятини самарали олиб боришини таъминлаш мақсадида аниқ чора-тадбирлар ва вазифалар белгилаб олинди.