Ҳуқуқни муҳофаза қилиш академиясида Иқтисодий жиноятларга қарши курашиш департаментининг туман ва шаҳар бўлинмалари тезкор ходимлари ҳамда криминалист мутахассислари учун “Порахўрлик жиноятларига қарши курашишда тезкор-қидирув ва криминалистик фаолият ҳамкорлиги” мавзусидаги қисқа муддатли малака ошириш курси якунланди.
Ўқув дастури доирасида тингловчилар порахўрлик жиноятларини фош этишнинг назарий ва амалий асослари, тезкор-қидирув тадбирларини процессуал жиҳатдан тўғри расмийлаштириш ҳамда улар натижаларидан жиноят процессида исбот қилиш воситаси сифатида самарали фойдаланиш масалаларини чуқур ўргандилар.
Шу билан бирга, машғулотларда рақамли криминалистика ва замонавий ахборот технологияларининг имкониятлари, жумладан электрон маълумотлар ва криптоактивлар билан ишлаш, суд-компьютер ва фоноскопия экспертизаларини ўтказиш, очиқ манбалар таҳлили асосида иқтисодий хавфсизликни таъминлаш ҳамда жиноий даромадларни легаллаштириш механизмларини аниқлаш масалаларига алоҳида эътибор қаратилди.
Курс доирасида порахўрлик жиноятларини тергов қилишда криминалист мутахассис иштирокининг аҳамияти, ҳужжатларнинг техник экспертизаси ҳамда процессуал мажбурлов чораларини қўллашнинг ҳуқуқий жиҳатлари комплекс тарзда ёритилди.
Машғулотлар соҳанинг тажрибали мутахассислари ва экспертлари томонидан интерфаол методлар, кейс-таҳлил ва амалий машқлар шаклида ташкил этилди. Курс якунида тингловчиларнинг билим ва кўникмалари баҳоланиб, уларга тегишли сертификатлар топширилди.
Мазкур курс соҳавий ходимларнинг касбий салоҳиятини ошириш, тезкор-қидирув ва криминалистик фаолият ўртасидаги ҳамкорликни мустаҳкамлаш ҳамда порахўрлик жиноятларини фош этиш самарадорлигини оширишга хизмат қилади.