Ўзбекистон Республикаси Ҳуқуқни муҳофаза қилиш академиясида таълим сифатини ошириш, давлат тилида иш юритиш маданиятини шакллантириш ва ўқув материалларини профессионал даражада тайёрлаш мақсадида давлат тилида иш юритиш соҳасида мутахассисни Академия фаолиятига вақтинча асосда жалб қилиш эҳтиёжи мавжуд.
Номзод томонидан тақдим этилган ҳужжатлар маъқулланган тақдирда, у билан Академия ўртасида икки томонлама фуқаролик-ҳуқуқий шартнома имзоланади.
Мутахассис Академияга белгиланган йўналишда экспертлик ва ўқув-услубий ёрдам кўрсатади. Шунингдек, электив курс доирасида давлат тилида иш юритишга оид ўқув материаллари ва презентацияларини ишлаб чиқишда иштирок этади.
Мутахассис расмий-идоравий услуб, имло ва услубий меъёрларга риоя этилган ҳолда матнлар тайёрлаш ва таҳрир қилиш бўйича Академия ходимларининг илмий-педагогик салоҳиятини оширишга кўмаклашади.
Давлат тилида иш юритишга оид меъёрий-ҳуқуқий ҳужжатлар, намунавий ҳужжатлар ва иш қоғозларини таҳлил қилиш, шунингдек улар асосида ўқув контенти яратишда иштирок этади.
Ўқув материалларининг тингловчилар билим даражасига мос, тушунарли ва визуал жиҳатдан самарали шаклда тақдим этилишини таъминлашга кўмаклашади. Академияда ишлаб чиқилган контентни рақамли таълим платформалари ва презентация форматларига мослаштиришда иштирок этади.
Кафедра профессор-ўқитувчилари билан ҳамкорликда ўқув дастури ва мавзуларига мувофиқ контент ишлаб чиқишда иштирок этади. Шунингдек, яратилган материалларни доимий равишда янгилаб бориш, амалдаги қонунчилик ва меъёрий ҳужжатлар асосида такомиллаштиришга кўмаклашади.
Мутахассис ўқув жараёнида фойдаланиладиган материалларнинг сифати, аниқлиги ва методик жиҳатдан тўғрилигини таъминлашга кўмаклашади.
Номзод олий, тугалланмаган олий ёки ўрта (ўрта-махсус) маълумотга эга бўлиши лозим. У 18 ёшдан кичик ва 50 ёшдан катта бўлмаслиги керак. Шунингдек, ўз фаолияти соҳасида замонавий техника ва дастурларда ишлаш кўникмаларига эга бўлиши талаб этилади.
Академия прокуратура органлари тизимига кирувчи таълим муассасаси бўлгани сабабли, мутахассис сифатида жалб қилинган шахс прокуратура органларида ўрнатилган ахлоқ талабларига қатъий амал қилиши лозим.
Иш муддати икки ойга белгиланади. Келгусида заруратга кўра меҳнат шартномаси асосида ва Академиянинг штатлар жадвалига мувофиқ хизматга қабул қилиниши мумкин.
Бажарилган иш учун тўлов миқдори тарафлар келишуви билан белгиланади. Тўлов мутахассис томонидан бажарилган ишлар натижасига кўра хизматларни топшириш-қабул қилиш далолатномаси имзоланганидан сўнг ҳар ой тўлаб борилади.
Номзод масъулиятли, профессионал, ташаббускор бўлиши, жамоа билан ҳамкорликда ишлай олиши ҳамда берилган топшириқларни ўз вақтида ва сифатли бажара олиши лозим.
Иш вақти ҳафтасига беш кун, ҳар куни соат 09:00 дан 18:00 гача бўлиб, 40 соатлик иш ҳафтасига мос келади.
Мутахассис ўз фаолиятини бевосита Академияда амалга оширади. Алоҳида ҳолларда, тарафлар келишувига кўра, айрим ишлар масофадан бажарилиши мумкин.
Талабгор Академия Тил ўргатиш кафедрасига фуқаролик паспорти ёки ID-картаси билан шахсан мурожаат қилиб, шахсини тасдиқловчи ҳужжат, объективка, маълумот тўғрисидаги ҳужжат (диплом ва унинг иловаси), сертификатлар нусхалари, меҳнат дафтарчаси кўчирмаси, СТИР ва ПИНФЛ маълумотномасини тақдим этиши лозим.
Тақдим этилган ҳужжатлар ўрганиб чиқилгандан сўнг, заруратга кўра талабгор билан комиссия таркибида суҳбат ўтказилади.
Ҳужжатлар 2026 йил 14 март кунига қадар (шу куни ҳам) топширилиши лозим.
Манзил: Тошкент шаҳри, Юнусобод тумани, Рихсили кўчаси, 9-уй (мўлжал: эски «Зенит» заводи).
Ҳужжатлар душанба–жума кунлари соат 10:00 дан 17:00 гача қабул қилинади.
Мурожаат учун телефон: 71-202-04-96 (1763).