Ўзбекистон Республикаси Ҳуқуқни муҳофаза қилиш академиясида магистратура тингловчилари учун “Магистрлик диссертациясини ёзишда илмий тадқиқот методологиясини қўллаш: амалий тажриба ва тавсиялар” мавзусида семинар-тренинг ташкил этилди.
Тадбирда Тошкент давлат юридик университети “Ҳуқуқ, жамият ва маданият” шуъбаси профессор в.б., педагогика фанлари доктори С.Н.Аллаярова маъруза билан иштирок этди. У ўз чиқишида замонавий илмий фаолиятда тадқиқот методологиясининг аҳамияти тобора ортиб бораётганини таъкидлаб, магистрлик диссертацияси магистрантнинг мустақил илмий фикрлаши, таҳлилий ёндашуви ва илмий муаммолар ечимига доир асосли таклифлар ишлаб чиқиш қобилиятини намоён этувчи муҳим илмий иш эканини қайд этди.
Семинар давомида илмий тадқиқотни ташкил этишнинг методологик асослари, тадқиқот муаммосини аниқлаш, илмий гипотеза шакллантириш, мақбул тадқиқот методларини танлаш ҳамда эмпирик маълумотларни таҳлил қилиш масалалари юзасидан амалий тавсиялар берилди.
Тадбир интерактив руҳда ўтказилиб, магистратура тингловчилари томонидан диссертация тайёрлаш жараёнида учрайдиган долзарб масалалар муҳокама қилинди. Семинар иштирокчиларнинг илмий тадқиқот олиб бориш кўникмаларини мустаҳкамлашга хизмат қилди.