Ўзбекистон Республикаси Ҳуқуқни муҳофаза қилиш академияси томонидан “Илмий тадқиқотларни ривожлантириш истиқболлари: муаммо ва ечимлар” мавзусида ўтказилган республика илмий-амалий конференция материаллари тўплами нашр этилди.
Мазкур тўпламда илмий даражали кадрлар тайёрлаш соҳасида амалга оширилаётган ислоҳотлар ва келгуси устувор вазифалар, юридик фанлар ихтисослиги бўйича илмий кадрлар тайёрлаш сифатини оширишнинг долзарб масалалари, ҳуқуқий фан ва илмий тадқиқотларда рақамли технологиялар ҳамда сунъий интеллект имкониятларидан фойдаланиш истиқболлари кенг ёритилган.
Шунингдек, тўпламда илмий тадқиқот фаолиятини ривожлантиришнинг долзарб муаммолари, ёш тадқиқотчилар салоҳиятини юксалтириш масалалари, қонун устуворлигини таъминлашда ҳуқуқни муҳофаза қилувчи органлар фаолиятини такомиллаштиришга қаратилган илмий ва амалий ёндашувлар ҳамда жиноятларни ўз вақтида фош этиш ва тергов самарадорлигини оширишга доир замонавий ғоя ва таклифлар ўз ифодасини топган.
Тўпламга фан ва таълим соҳасини бошқаришга ваколатли давлат органлари, ҳуқуқни қўллаш амалиёти билан боғлиқ ташкилотлар ходимлари, юридик таълим муассасалари профессор-ўқитувчилари, докторантлар ҳамда мустақил изланувчиларнинг илмий мақолалари ва тезислари киритилган.
Нашр илмий тадқиқотлар сифатини ошириш, ҳуқуқий фанни ривожлантириш ҳамда ҳуқуқни муҳофаза қилувчи органлар фаолиятини такомиллаштиришга хизмат қилади.