Ҳуқуқни муҳофаза қилиш академиясида коррупцияга қарши курашишнинг комплекс тизими жорий этилган.
Унга мувофиқ, Академиянинг коррупцияга қарши курашиш сиёсати, коррупциявий хавф-хатарларни аниқлаш ва баҳолаш тартиби, харид қилиш жараёнларини ташкил этиш ва ўтказиш, ходимларни комплекс текширишдан ўтказиш, коррупциявий ҳуқуқбузарликлар ҳақидаги хабарлар билан ишлаш, тизимни мониторинг ва назорат қилиш тартиблари, шунингдек тизимга масъул бўлинма фаолиятини тартибга солувчи қатор ички ҳужжатлар тасдиқланиб, коррупцияга қарши курашиш тизими тўлақонли йўлга қўйилган.
Коррупцияга қарши курашиш тизими самарадорлигини янада ошириш мақсадида Академиянинг одил судловни мустаҳкамлаш соҳасидаги ўқув-услубий, илмий ва эксперт-таҳлилий фаолияти айни вақтда Германия халқаро ҳамкорлик ташкилоти (GIZ) кўмагида SERT International халқаро компанияси томонидан ISO 37001:2025 “Коррупцияга қарши курашиш менежмент тизими” халқаро стандартига мувофиқлик аудитидан ўтказилмоқда.
Мазкур сертификатлаштириш аудити Ўзбекистонда коррупцияга қарши курашиш соҳасида амалга оширилаётган кенг кўламли ислоҳотларнинг мантиқий давоми бўлиб, ҳуқуқни муҳофаза қилиш соҳаси учун кадрларни ҳалоллик стандартлари асосида тайёрлаш самарадорлигини янада оширишга хизмат қилади.