Ўзбекистон Республикаси Ҳуқуқни муҳофаза қилиш академиясида атроф-муҳитга эҳтиёткорона муносабат ва экологик маданиятни шакллантиришга қаратилган ташаббуслар изчил амалга оширилмоқда. Ушбу йўналишдаги навбатдаги амалий қадам сифатида кўкаламзорлаштириш акцияси ташкил этилди.
Мазкур ташаббус доирасида Академияга яқин ҳудудда жойлашган 191-сонли мактабгача таълим муассасаси ҳудудида 40 та мевали дарахт кўчатлари экиб чиқилди. Тадбирда Академия ходимлари фаол иштирок этдилар.
Экилган дарахтлар қаторига олма, ўрик, гилос ва шафтоли киритилди. Мевали дарахтларни танлаш уларнинг нафақат экологик аҳамияти, балки амалий фойдаси – болалар учун қулай ва соғлом муҳит яратиш, микроклиматни яхшилаш ҳамда шаҳар экотизимига ижобий таъсир кўрсатиш билан изоҳланади.
Бундай ташаббуслар Академия томонидан барқарор ривожланиш тамойилларини илгари суриш, экологик онгни ошириш ва ижтимоий масъулиятни мустаҳкамлашга қаратилган тизимли ишлар сифатида қаралади. Айниқса, жамоани амалий экологик лойиҳаларга жалб этишга алоҳида эътибор қаратилмоқда.
Ҳуқуқни муҳофаза қилиш академияси бундан буён ҳам экологик ташаббусларни изчил давом эттириб, табиий ресурсларни асраш, яшил ҳудудларни кенгайтириш ва атроф-муҳит сифатини яхшилашга ўз ҳиссасини қўшиб боради.