Ҳуқуқни муҳофаза қилиш академиясида Ҳуқуқни муҳофаза қилиш фаолияти муаммоларини илмий-амалий тадқиқ этиш маркази билан Тошкент давлат юридик университетининг Жиноий одил судлов факультети Тадқиқот маркази вакиллари иштирокида учрашув ташкил этилди.
Учрашув доирасида Академия марказининг фаолияти, амалга оширилаётган илмий-амалий тадқиқотлар ҳамда жиноятчиликнинг олдини олишга қаратилган лойиҳалар юзасидан тақдимот ўтказилди. Меҳмонлар марказнинг жиноятчиликка қарши курашиш, криминологик таҳлил методологияси ва соҳадаги долзарб муаммоларни ўрганиш бўйича тажрибаси билан яқиндан танишдилар.
Мулоқот якунида томонлар фикр ва таклифлар алмашиб, келгусидаги ҳамкорликнинг устувор йўналишлари сифатида қўшма илмий-амалий лойиҳаларни ишлаб чиқиш, биргаликда тадқиқотлар олиб бориш ҳамда академик алмашинув дастурларини йўлга қўйиш бўйича келишиб олдилар.
Шунингдек, меҳмонлар Академиянинг моддий-техник базаси ва ўқув инфратузилмаси билан танишдилар. Хусусан, талабалар учун яратилган замонавий шарт-шароитлар, минтақада ягона бўлган Рақамли криминалистика институти фаолияти, бой адабиётлар фондига эга Ахборот-ресурс маркази ҳамда криминалистик лабораториялар катта қизиқиш уйғотди.
Учрашув икки томонлама ҳамкорликни янги босқичга олиб чиқиш йўлида навбатдаги қадам бўлди. Томонлар яқин вақт ичида қўшма илмий-амалий тадқиқот лойиҳаларини расмийлаштиришга қаратилган ҳамкорлик чора-тадбирларини ишлаб чиқишга келишиб олдилар.