Ўзбекистон Республикаси Ҳуқуқни муҳофаза қилиш академияси ахборот-ресурс марказининг Алишер Навоий номидаги Миллий кутубхона электрон ахборот ресурслари базалари ҳамда етакчи хорижий илмий нашриётлар ва маълумотлар базаларига уланиши таъминланди.
Жумладан, Миллий кутубхонанинг media.natlib.uz, natlib.uz, diss.natlib.uz ва press.natlib.uz электрон ресурсларига, шунингдек EBSCO, ProQuest, Oxford University Press, PressReader, EastView, CNKI, Emerald Publishing, Wiley каби халқаро илмий платформаларга кенг қамровли кириш имконияти яратилди.
Шу билан бирга, EIFL халқаро консорциумининг лицензияланган дастури доирасида ACM Digital Library, Royal Society Journals Collection, IWA Publishing Journals, European Respiratory Journal, Edward Elgar Publishing, e-Duke Journals Scholarly Collection каби нуфузли илмий базалардан фойдаланиш имконияти таъминланди.
Барча ресурсларга ягона электрон кутубхона платформаси орқали марказлашган тарзда кириш имконияти йўлга қўйилган бўлиб, бу фойдаланувчилар учун қулай ва самарали ишлаш шароитини яратади.
Яратилган имкониятлар Академия профессор-ўқитувчилари, тадқиқотчилари ва талабалари учун илмий-тадқиқот ишлари сифатини ошириш, таҳлилий фикрлашни ривожлантириш ҳамда халқаро илмий-таълим маконига интеграциялашувни янада кучайтиришга хизмат қилади.