Вазирлар Маҳкамаси ҳузуридаги Давлат тест маркази билан ҳамкорликда ўқув-семинар ўтказилди

Жорий йилнинг 11 январь куни Ўзбекистон Республикаси Вазирлар Маҳкамаси ҳузуридаги Давлат тест маркази билан ҳамкорликда ўқув жараёнига оид тестлар тузиш методикаси ва уларни амалиётда қўллаш масалалари юзасидан ўқув-семинар ўтказилди. Семинарда Давлат тест маркази Тестология, педагогик ўлчовлар ва илмий-методик кадрлар тайёрлаш бўлими бошлиғи М.Ш.Закирова, Давлат божхона қўмитасининг Божхона институти вакили ва Академия профессор-ўқитувчилари, ходимлари иштирок этди.

Ўқув-семинарда прокуратура органлари ходимларининг малакасини ошириш жараёнига замонавий педагогик ва ахборот-коммуникация технологиялари, электрон таълимни жорий этиш сифатини ошириш мақсадида турли хил тестларни тузиш қоидалари, қийинлик даражаларига кўра шакллантириш ва бошқа ўзига хос хусусиятлари атрофлича таҳлил қилинди. Жумладан, билим ва кўникмаларини аниқлашда ёпиқ турдаги тестларни қўллаш ҳамда креатив фикрлашини ривожлантириш мақсадида очиқ турдаги тестлардан фойдаланишнинг замонавий ёндашувлари муҳокама қилинди.

Шунингдек, ҳозирги даврнинг талаби сифатида ўқув жараёнини оддийдан мураккабликга қараб ташкил этиш мақсадида тестларни қийинлик даражаларига кўра табақалаштириш зарурлиги  таъкидланди. Бунда тестларнинг қийинлик даражасини дастлаб эслаш, хотирлашга йўналтириш ва ўйлаш, фикр юритиш, мулоҳаза қилишни талаб этиш ҳамда ўзлаштирилган билимларни ижодий бажариш, ностандарт ҳолатларда билимларни қўллаш қобилиятини аниқлаш даражасигача олиб чиқиш тавсия қилинди.