Ўзбекистон Республикаси Ҳуқуқни муҳофаза қилиш академияси томонидан рақамли ҳуқуқбузарликлар соҳасида судьялар компетенцияларини изчил ривожлантириш доирасида ЕХҲТнинг Ўзбекистондаги лойиҳалар координатори ва Одил судлов академияси билан ҳамкорликда “АКТ-жиноятлари: аниқлашдан суд қарорига қадар (судьялар учун кириш курси)” мавзусидаги семинар-тренинг ташкил этилди. Мазкур тадбир жорий йилнинг 24–25 март кунлари Самарқанд шаҳрида бўлиб ўтди.
Семинарда тергов судьялари, шунингдек ахборот технологиялари соҳасидаги жиноятлар билан боғлиқ жиноят ишларини кўриб чиқувчи судьялар, жумладан вилоят, шаҳар ва туман судларининг жиноят ишлари бўйича коллегиялари вакиллари иштирок этдилар.
Етакчи экспертлар сифатида Ўзбекистон Республикаси Ҳуқуқни муҳофаза қилиш академиясининг Рақамли криминалистика илмий-тадқиқот институти ходимлари – юридик фанлар бўйича фалсафа доктори (PhD), Ихтисослаштирилган рақамли тадқиқотлар маркази бошлиғи Хагани Гаджиев ҳамда Кибержиноятларга қарши курашиш ва рақамли терговга кўмаклашиш маркази бошлиғи Бунёд Қудратов иштирок этдилар.
Тренинг дастури судьяларда АКТ соҳасидаги жиноятларни малакалаш ва кўриб чиқиш бўйича замонавий компетенцияларни шакллантиришга қаратилди. Жумладан, жиноят процессида рақамли далилларнинг мақбуллиги, уларнинг алоқадорлиги ва ишончлилигини баҳолаш мезонлари, электрон маълумотларни тадқиқ қилиш усуллари ҳамда кибержиноятчиликка қарши курашиш соҳасидаги халқаро-ҳуқуқий стандартларга алоҳида эътибор қаратилди.
Тадбир якунида иштирокчиларга сертификатлар топширилди. Иштирокчилар тренингнинг амалий аҳамияти, материалларнинг долзарблиги ва экспертларнинг юқори профессионал даражасини қайд этиб, бундай тадбирларни мунтазам ўтказиш зарурлигини таъкидладилар.