Ўзбекистон Республикаси Ҳуқуқни муҳофаза қилиш академиясига Беларусь Республикаси Тергов қўмитаси раиси ўринбосари А.И.Васильев бошчилигидаги делегация ташриф буюрди.
Учрашув давомида Беларусь томони вакилларига Академия фаолияти, унинг ташкилий тузилмаси, устувор йўналишлари, шунингдек прокуратура ва тергов органлари учун кадрлар тайёрлашга хизмат қилаётган замонавий таълим инфратузилмаси ҳақида батафсил маълумот тақдим этилди.
Мулоқот чоғида таълим жараёнини ташкил этиш масалаларига алоҳида эътибор қаратилди. Жумладан, замонавий педагогик ёндашувлар, рақамли технологиялар ва амалий кўникмаларни шакллантиришга қаратилган ўқитиш усуллари муҳокама қилинди.
Ташриф доирасида делегация Академиянинг Рақамли криминалистика илмий-тадқиқот институти фаолияти билан танишиб, унинг илмий салоҳияти ва амалий аҳамиятига алоҳида қизиқиш билдирди.
Ўзаро фикр алмашув жараёнида томонлар ҳамкорликнинг истиқболли йўналишларини, жумладан қўшма таълим дастурлари, тажриба алмашиш ва илғор амалиётларни жорий этиш масалаларини муҳокама қилдилар.
Ташриф конструктив ва амалий руҳда ўтди. Унинг якунлари бўйича ўзаро манфаатли ҳамкорликни янада кенгайтириш ва мустаҳкамлашга келишиб олинди.