Ўзбекистон Республикаси Ҳуқуқни муҳофаза қилиш академияси вакиллари иштирокида Криминология тадқиқот институтида “Маҳалла еттилиги” фаолиятида жиноятларни барвақт олдини олишнинг самарали механизмлари ва илғор тажрибалар” мавзусида республика илмий-амалий конференцияси бўлиб ўтди.
Мазкур нуфузли тадбирда Академия маркази бошлиғи Ш.Б.Мустафаев иштирок этиб, “Жиноятларни олдини олиш ва профилактика қилишнинг комплекс тизимини такомиллаштириш: илмий ва амалий ёндашувлар” мавзусида маъруза қилди.
Маърузада жиноятларни барвақт олдини олиш ва профилактика қилиш тизимини такомиллаштиришнинг устувор йўналишлари, мазкур жараёнга илмий ёндашувларни чуқур жорий этиш ҳамда илғор амалий механизмларни самарали татбиқ этиш масалалари атрофлича ёритилди.
Шунингдек, профилактика фаолиятида комплекс ёндашувни кучайтириш, идоралараро ҳамкорликни мустаҳкамлаш, илмий ишланмаларни амалиёт билан уйғунлаштиришнинг долзарб жиҳатларига алоҳида эътибор қаратилди.
Конференция доирасида жиноятчиликни барвақт олдини олиш, маҳалла тизимида профилактика самарадорлигини ошириш ҳамда соҳада замонавий ёндашувларни кенг жорий этишга қаратилган таклиф ва мулоҳазалар билдирилди.
Ҳуқуқни муҳофаза қилиш академияси жиноятларни олдини олиш ва профилактика қилиш соҳасида илмий-таҳлилий салоҳиятни янада мустаҳкамлаш, шунингдек, амалиётга йўналтирилган илғор ташаббусларни қўллаб-қувватлашга алоҳида аҳамият қаратиб келмоқда.