Ўзбекистон Республикаси Ҳуқуқни муҳофаза қилиш академияси ишчи гуруҳи томонидан республикамиз ҳудудларида, маҳаллаларда криминоген вазиятни ўрганиш бўйича комлекс-чора-тадбирлар изчил давом эттирилмоқда.
Жорий йилнинг март ойида Тошкент вилоятининг Олмалиқ шаҳрининг “Алишер Навоий”, “Мирзо Улуғбек”, “Темур Малик” ҳамда “Хамза” маҳаллаларида криминоген вазиятни илмий ёндашувлар асосида ўрганиш ишлари олиб борилди.
Ўрганиш жараёнида ҳуқуқбузарликларнинг келиб чиқиш сабаблари, уларга таъсир этувчи ижтимоий-иқтисодий омиллар, шунингдек амалдаги профилактик чора-тадбирларнинг самарадорлиги атрофлича таҳлил этилди.
Академия томонидан жиноятчиликнинг барвақт олдини олишга қаратилган фаолиятни методик жиҳатдан таъминлаш, илмий ёндашувларни амалиётга жорий этиш ҳамда мазкур йўналишда амалга оширилаётган ишларга кўмаклашишга алоҳида эътибор қаратилади.
Олиб борилаётган таҳлиллар натижаларига кўра, ҳар бир маҳалланинг ўзига хос хусусиятларини инобатга олган ҳолда илмий асосланган таклиф ва тавсиялар ишлаб чиқилиб, улар келгусида жиноятчилик профилактикаси самарадорлигини оширишга қаратилган “йўл хариталари”га киритилади.