Ҳуқуқни муҳофаза қилиш академиясида Plag.uz / StrikePlagiarism.com компанияси мутахассислари иштирокида академик ҳалолликни таъминлашнинг замонавий механизмларига бағишланган семинар-тренинг ташкил этилди.
Тадбир давомида рақамли технологиялар ва сунъий интеллект (СИ) жадал ривожланаётган шароитда академик ҳалолликни таъминлашнинг долзарб масалалари муҳокама қилинди. Иштирокчиларга академик ҳалолликнинг замонавий тамойиллари ҳамда сунъий интеллект ёрдамида яратилган контентни аниқлаш технологиялари тақдим этилди.
Шунингдек, антиплагиат тизимларини четлаб ўтишнинг кенг тарқалган усуллари – белгиларни алмаштириш, мазмунсиз парафразлар, яширин матнлардан фойдаланиш ва “уникаллаштириш” сервислари – атрофлича кўриб чиқилди.
Мутахассислар StrikePlagiarism.com тизимининг янги имкониятларини намойиш этиб, манипуляцияларни аниқлаш, СИ-контент бўйича ҳисоботлар тайёрлаш ҳамда текширув воситаларини таълим платформалари билан интеграция қилиш имкониятлари ҳақида маълумот бердилар.
Семинар-тренинг доирасида иштирокчилар амалий кейслар ва намойишлар орқали замонавий тизимларнинг турли кўринишдаги плагиат ва СИ орқали қайта ишланган матнларни аниқлаш имкониятлари билан танишдилар.
Мазкур тадбир академик ҳалолликни таъминлаш, таълим сифатини ошириш ва илғор тажрибаларни жорий этишга хизмат қилади.