Ўзбекистон Республикаси Ҳуқуқни муҳофаза қилиш академиясининг «Тергов фаолияти» йўналиши 3-босқич талабаси Машхура Мардонова Вена халқаро марказида БМТнинг Наркотиклар ва жиноятчиликка қарши курашиш бошқармаси (UNODC) томонидан Model UNCAC Youth COSP ташаббуси доирасида ташкил этилган Capacity-Building Workshop халқаро ўқув семинарида иштирок этди.
Тадбир турли давлатлардан ёш иштирокчиларни бирлаштириб, БМТнинг Коррупцияга қарши конвенцияси доирасида коррупцияни олдини олиш, жиноятлаштириш, халқаро ҳамкорлик ва активларни қайтариш масалаларига бағишланди.
Семинарда коррупцияга қарши курашда замонавий технологиялардан фойдаланиш, жумладан сунъий интеллект имкониятлари, унинг профилактикадаги ўрни, шунингдек, ушбу йўналишдаги хавф ва этик жиҳатлар муҳокама қилинди.
Амалиёт қисмида иштирокчилар халқаро музокаралар моделини ишлаб чиқиш орқали антикоррупция резолюцияси лойиҳасини тайёрлашда иштирок этдилар.
Мазкур иштирок Академиянинг халқаро таълимий ҳамкорликни изчил ривожлантираётганини, талабаларни глобал антикоррупция кун тартибига жалб этиш ва уларни халқаро стандартлар асосида тайёрлашга қаратилган ёндашувини яна бир бор намоён этди.