Ўзбекистон Республикаси Президенти раислигида жорий йилнинг 27 январь куни ўтказилган видеоселектор йиғилишида белгиланган вазифалар, хусусан тергов сифатини ошириш ва унинг шаффофлигини таъминлашга қаратилган топшириқлар ижросини таъминлаш доирасида Ҳуқуқни муҳофаза қилиш академияси томонидан қатор чора-тадбирлар амалга оширилмоқда.
Жумладан, Академия ходимлари томонидан Тошкент вилояти прокуратураси ҳамда ички ишлар органлари терговчилари иштирокида ўқув-амалий семинар ташкил этилди.
Семинар давомида ахборот технологиялари ёрдамида содир этилаётган жиноятларни аниқлаш ва тергов қилиш масалаларига алоҳида эътибор қаратилди.
Шунингдек, кибержиноятларни фош этишда тезкор маълумот алмашинувини таъминлаш, рақамли муҳитда далилларнинг яхлитлигини сақлаган ҳолда тўплаш, шунингдек электрон қурилмалар ва онлайн платформалар билан ишлашнинг муҳим жиҳатлари муҳокама қилинди.
Семинар иштирокчилари томонидан амалий фаолиятда юзага келаётган долзарб масалалар муҳокама қилиниб, ўзаро фикр ва тажриба алмашилди.