Маҳаллаларда хавфсиз муҳитни таъминлаш ва ҳуқуқбузарликларни барвақт олдини олиш самарадорлигини ошириш мақсадида Ўзбекистон Республикаси Ҳуқуқни муҳофаза қилиш академияси томонидан «илмий хулоса – тавсия – натижа» тамойили асосида тизимли ишлар амалга оширилмоқда.
Мазкур фаолият доирасида Академия ишчи гуруҳлари томонидан бириктирилган маҳаллаларда криминоген вазият комплекс таҳлил қилиниб, ҳуқуқбузарликларнинг асосий сабаб ва шарт-шароитлари, шунингдек, мавжуд ижтимоий-маиший муаммолар ўрганилмоқда. Айниқса, хавф гуруҳига кирувчи шахслар билан манзилли ишлашга алоҳида эътибор қаратилмоқда.
Академия бошлиғининг биринчи ўринбосари Е.В.Коленко раҳбарлигидаги ишчи гуруҳ томонидан Тошкент вилоятининг Ангрен ва Олмалиқ шаҳарларидаги “қизил” тоифадаги маҳаллаларга чиқишлар амалга оширилиб, жиноятларни ўз вақтида аниқлаш ва уларнинг олдини олиш масалалари илмий ёндашувлар асосида ўрганилмоқда.
Ўзбекистон Республикаси Бош прокурорининг биринчи ўринбосари Б.Б.Валиев раҳбарлигидаги Республика идоралараро мувофиқлаштириш штаби томонидан Тошкент вилоятининг Ангрен ва Олмалиқ шаҳарларида ўрганиш ишлари олиб борилди.
Жумладан, штаб аъзолари томонидан Олмалиқ шаҳрининг “Ҳамза” маҳалласига ташриф буюрилиб, “маҳалла еттилиги” вакиллари билан манзилли мулоқотлар ташкил этилди. Унда Академия бошлиғининг биринчи ўринбосари Е.В.Коленко томонидан ҳудуддаги криминоген вазиятни барқарорлаштириш, ҳуқуқбузарлик ва жиноятларнинг барвақт олдини олиш, айниқса хавф гуруҳига кирувчи шахслар билан индивидуал ишлаш самарадорлигини ошириш масалалари юзасидан тақдимот қилинди.
Тақдимотда сўнгги уч йил давомида содир этилган жиноятлар чуқур таҳлил қилиниб, ҳуқуқбузарликларнинг асосий сабаблари, уларни бартараф этиш йўллари ҳамда профилактик ҳисобда турган шахслар билан ишлаш механизмлари ўрганилгани қайд этилди. Шунингдек, маҳаллада криминоген вазиятни яхшилаш, профилактик ишларни кучайтириш ва жамоат хавфсизлигини таъминлаш бўйича манзилли таклиф ва тавсиялар ишлаб чиқилган.
Жумладан, бозор ва савдо ҳудудларида жамоат тартибини таъминлаш, ҳуқуқбузарликларнинг олдини олиш бўйича назоратни кучайтириш ҳамда тегишли идоралар ўртасидаги ҳамкорликни мустаҳкамлаш юзасидан аниқ вазифалар белгилаб олинди.
Шу билан бирга, Олмалиқ шаҳрининг “А.Навоий”, “М.Улуғбек”, “Темур Малик” ва “Ҳамза” маҳаллаларида “маҳалла еттилиги” аъзолари билан суҳбатлар ўтказилиб, жиноятларнинг олдини олиш ва аҳолининг ҳуқуқий маданиятини оширишга қаратилган қўшимча таклифлар ишлаб чиқилди.
Академия мутахассислари томонидан тайёрланаётган хулоса ва тавсиялар маҳаллаларда хавфсиз муҳитни шакллантириш, жамоат тартибини сақлаш ҳамда ҳуқуқбузарликларнинг олдини олиш тизими самарадорлигини оширишга хизмат қилмоқда.