Ўзбекистон Республикаси Ҳуқуқни муҳофаза қилиш академиясида магистратура тингловчилари учун миллий ва халқаро электрон ахборот ресурслари билан ишлаш кўникмаларини ривожлантиришга қаратилган махсус тренинг ташкил этилди.
Тадбир Ўзбекистон Миллий кутубхонаси мутахассислари иштирокида ўтказилиб, таълим олувчиларнинг илмий-тадқиқот фаолияти сифатини ошириш ва академик тайёргарлигини мустаҳкамлашга қаратилган тизимли ишлар доирасида ташкил этилди.
Тренинг давомида иштирокчилар Миллий кутубхона томонидан тақдим этилаётган электрон ресурслар ҳамда халқаро илмий маълумотлар базаларидан самарали фойдаланиш имкониятлари билан батафсил танишдилар. Ушбу ресурслар орқали замонавий илмий тадқиқотлар натижалари, таҳлилий материаллар ва долзарб илмий маълумотларга кенг кириш имкониятлари яратилгани таъкидланди.
Хусусан, ProQuest платформаси имкониятларига алоҳида эътибор қаратилиб, у орқали дунёдаги энг йирик тўлиқ матнли диссертациялар базасидан фойдаланиш, илмий ахборотни излаш, саралаш ва таҳлил қилиш бўйича амалий кўникмалар шакллантирилди.
Бундай тренинглар магистрларнинг академик манбалар билан ишлаш компетенцияларини мустаҳкамлаш, илмий тадқиқот ишлари сифатини ошириш ҳамда уларнинг халқаро илмий-таълим маконига интеграциялашувини кенгайтиришга хизмат қилади.