Ўзбекистон Республикаси Адлия вазирлиги ҳузуридаги Х.Сулаймонова номидаги Республика суд экспертиза марказида ёшлар билан ишлаш бўйича тизимли чора-тадбирлар доирасида “Раҳбар ва ёшлар учрашуви” рукнида навбатдаги тадбир бўлиб ўтди.
Мазкур учрашувда Марказ директори, юридик фанлари бўйича фалсафа доктори (PhD) А.У.Халилов ҳамда Ўзбекистон Республикаси Ҳуқуқни муҳофаза қилиш академиясининг 3-босқич талабалари иштирок этдилар.
Учрашув давомида суд экспертизаларининг жиноятларни очиш, ҳақиқатни аниқлаш ва адолатни таъминлашдаги ҳал қилувчи ўрни, соҳадаги замонавий ёндашувлар, илмий-амалий фаолият ҳамда кадрлар тайёрлаш масалалари атрофлича муҳокама қилинди. Талабаларга суд эксперти фаолиятининг ўзига хос жиҳатлари, амалий кўникмалар ва касбий масъулият ҳақида батафсил маълумотлар берилди.
Суд экспертизалари жиноят ишларини ҳар томонлама, тўлиқ ва холисона тергов қилишда, далилларни илмий асосда таҳлил этишда ҳамда ҳақиқатни аниқлашда ҳал қилувчи аҳамиятга эга экани таъкидланди.
Бугунги кунда суд-экспертлик фаолияти нафақат жиноят ишларида, балки фуқаролик, иқтисодий ва маъмурий ишларда ҳам муҳим аҳамият касб этаётгани, бу эса суд қарорларининг қонуний ва асосли бўлишини таъминлашда муҳим омил бўлиб хизмат қилаётгани қайд этилди.
Учрашув давомида талабалар ўзларини қизиқтирган саволлар билан мурожаат қилиш имконига эга бўлиб, уларга батафсил жавоблар берилди.