Жорий йилнинг 8 апрель куни Ўзбекистон Республикаси Ҳуқуқни муҳофаза қилиш академиясига Россия Федерацияси Бош прокурори А.В.Гуцан бошчилигидаги делегация ташриф буюрди.
Ташриф доирасида делегация аъзолари Академиянинг ташкилий тузилмаси ва асосий фаолият йўналишлари, прокуратура ва тергов органлари ходимларини тайёрлаш, қайта тайёрлаш ва малакасини ошириш тизими, шунингдек, ўқув жараёни билан яқиндан танишдилар.
Меҳмонларга Академияда амалий кўникмаларни шакллантиришга қаратилган замонавий таълим инфратузилмаси, илғор педагогик ва ахборот технологиялари асосида ташкил этилган ўқув жараёнлари, Рақамли криминалистика илмий-тадқиқот институти ҳамда Коррупцияга қарши курашиш виртуал академияси фаолияти тақдим этилди. Шунингдек, делегация вакиллари юридик клиника, криминалистик полигонлар, лабораториялар, суд жараёнларини имитация қилиш хоналари ва бошқа махсус ўқув объектлари, ахборот-ресурс маркази билан танишдилар.
Учрашув конструктив ва амалий руҳда ўтди. Академиянинг таълим, илм-фан ва амалиёт уйғунлигига асосланган фаолияти меҳмонларда катта қизиқиш уйғотди. Томонлар прокурор-тергов кадрларини тайёрлаш, қайта тайёрлаш ва уларнинг малакасини ошириш соҳасида ҳамкорликни янада кенгайтиришга келишиб олдилар.
Ташриф доирасида Россия Федерацияси Бош прокуратураси вакиллари иштирокида Академия тингловчилари учун туркум маърузалар ташкил этилди. Маърузаларда жиноятчиликка қарши курашишнинг замонавий тенденциялари, жумладан, МДҲ давлатларида жиноятчиликнинг қиёсий таҳлили ва унга қарши ҳамкорликда курашиш масалалари, рақамли трансформация шароитида кибержиноятчиликка қарши халқаро ҳамкорлик, шунингдек, гиёҳвандлик воситаларининг ноқонуний муомаласи ва шахсга қарши жиноятлар бўйича терговнинг ўзига хос жиҳатлари муҳокама қилинди.
Маърузалар интерактив шаклда, савол-жавоб ва фикр алмашинув асосида ўтди. Якунида иштирокчиларга сертификатлар топширилди.