Ўзбекистон Республикаси делегацияси Марказий Осиё давлатларининг ваколатли органлари салоҳиятини оширишга қаратилган, виртуал активлардан фойдаланган ҳолда пул ювиш ва ноқонуний наркотиклар айланмасига қарши курашиш масалаларига бағишланган халқаро стажировкада иштирок этди.
Тадбир Молиявий мониторинг бўйича халқаро ўқув-методик марказ ҳамда БМТнинг Гиёҳвандлик ва жиноятчилик бўйича бошқармаси томонидан миллий ҳамкорлар кўмагида ташкил этилди ва унда Марказий Осиёнинг барча давлатлари вакиллари иштирок этди.
Стажировка дастури доирасида иштирокчилар рақамли активлардан фойдаланиш билан боғлиқ жиноятларни аниқлаш ва бартараф этишнинг замонавий ёндашувларини кўриб чиқдилар. Хусусан, криптовалюта транзакцияларини таҳлил қилиш усуллари, шунингдек, жиноят ишлари доирасида криптоактивларни аниқлаш, кузатиш, хатловдан ўтказиш ва мусодара қилиш механизмларига алоҳида эътибор қаратилди.
Миллий тажриба алмашинуви сессиялари доирасида Ҳуқуқни муҳофаза қилиш академияси вакиллари томонидан жиноят қонунчилигини қўллаш амалиёти, криптоактивлар билан боғлиқ операцияларни таҳлил қилиш усуллари ҳамда ушбу тоифадаги ишлар бўйича суд амалиётининг ўзига хос жиҳатлари ёритилди. Тақдим этилган амалий мисоллар иштирокчилар томонидан юқори қизиқиш билан қабул қилиниб, касбий муҳокамаларга сабаб бўлди.
Стажировка якунлари бўйича рақамли активлардан фойдаланиш билан боғлиқ жиноятларни тергов қилишда идоралараро ва халқаро ҳамкорлик механизмларини янада такомиллаштиришнинг долзарблиги қайд этилди. Шунингдек, аҳоли, айниқса ёшлар ўртасида профилактик ишларни кучайтириш орқали уларнинг жиноий схемаларга жалб этилишининг олдини олиш зарурлиги таъкидланди.
Ҳуқуқни муҳофаза қилиш академияси рақамли криминалистика ва молиявий жиноятларга қарши курашиш соҳасида халқаро ҳамкорликни янада ривожлантириш, илғор тажрибаларни таълим ва илмий-тадқиқот жараёнларига жорий этишдад давом этади.