Маҳаллаларда хавфсиз муҳитни таъминлаш, ҳуқуқбузарликларнинг барвақт олдини олиш ва криминоген вазиятни илмий асосда таҳлил қилишга қаратилган тизимли ишлар доирасида, шунингдек профилактика фаолиятини методик жиҳатдан таъминлаш ва унинг самарадорлигини ошириш мақсадида Ўзбекистон Республикаси Ҳуқуқни муҳофаза қилиш академияси томонидан изчил чора-тадбирлар амалга оширилмоқда.
Ушбу вазифалар ижроси доирасида Академия ходимлари республика мувофиқлаштирувчи ишчи гуруҳ таркибида Ўзбекистон Республикаси Президентининг 2026 йил 5 январдаги ПҚ-1 ва ПҚ-2-сон қарорлари ижросини таъминлаш юзасидан Қорақалпоғистон Республикасининг Нукус шаҳри, Кегейли ва Қораузак туманларида жойларда ўрганишлар ўтказди.
Ташриф доирасида ҳудудларда ташкил этилган штаб аъзолари билан ишчи учрашувлар ўтказилди. Унда қарорлар ижросини таъминлаш мақсадида ишлаб чиқилган “Йўл хариталари”нинг бажарилиш ҳолати атрофлича таҳлил қилиниб, амалга ошириш жараёнида йўл қўйилаётган айрим хато ва камчиликлар муҳокама этилди.
Учрашувлар давомида масъулларга аниқ вазифалар белгилаб берилди, амалий тавсиялар тақдим этилди ҳамда белгиланган чора-тадбирларни ўз вақтида ва сифатли ижро этиш бўйича кўрсатмалар берилди.
Мазкур ишлар ҳудудларда хавфсиз муҳитни таъминлаш, жамоат хавфсизлигини мустаҳкамлаш ҳамда ҳуқуқбузарликларнинг барвақт олдини олиш тизими самарадорлигини оширишга хизмат қилади.