Ҳуқуқни муҳофаза қилиш академиясида таълим жараёнини амалиёт билан уйғунлаштиришга қаратилган клиник таълим тизими изчил ривожлантирилмоқда. Ушбу модель доирасида Юридик клиника фуқароларга бепул ҳуқуқий ёрдам кўрсатиш билан бирга, талабаларда амалий касбий кўникмаларни шакллантиришнинг самарали механизми сифатида хизмат қилмоқда.
Академияда жорий этилган рақамли ечимлар аҳоли учун ҳуқуқий ёрдамдан фойдаланиш имкониятларини сезиларли даражада кенгайтирмоқда. Хусусан, Академиянинг расмий веб-сайти Юридик клиниканинг махсус электрон платформаси билан интеграция қилинган бўлиб, фуқаролар айнан сайт орқали мурожаат юбориш, ҳуқуқий маслаҳат олиш ва ўз муаммолари юзасидан тезкор жавоблар олиш имкониятига эга.
Мазкур механизм, айниқса, чекка ҳудудларда истиқомат қилаётган аҳоли ҳамда жисмоний имконияти чекланган шахслар учун ҳуқуқий ёрдамдан фойдаланиш имкониятларини кенгайтиришда муҳим аҳамият касб этмоқда.
Мазкур йўналишдаги ишларни янада кенгайтириш мақсадида Академия билан Ўзбекистон Ногиронлар жамияти ҳамда “Sharoit Plus” ногиронлар жамоат бирлашмаси ўртасида ҳамкорлик меморандумлари имзоланди.
Меморандумлар доирасида ногиронлиги бўлган шахсларнинг ҳуқуқларини ҳимоя қилиш, уларга бепул ҳуқуқий маслаҳат ва амалий ёрдам кўрсатиш, давлат органлари билан ўзаро ҳамкорликни кучайтириш ҳамда инклюзив муҳитни ривожлантиришга қаратилган қатор вазифалар белгиланди.
Тадбир доирасида Юридик клиника фаолиятига бағишланган видеоролик намойиш этилди, шунингдек талабалар иштирокида саҳна чиқишлари ташкил этилди.
Учрашув якунида Юридик клиника фаолиятида фаол иштирок этган бир гуруҳ талабаларга сертификатлар тантанали равишда топширилди.
Клиник таълим, институционал ҳамкорлик ва рақамли хизматларни уйғунлаштириш орқали Академия аҳолига ҳуқуқий ёрдам кўрсатиш ҳамда амалиётга йўналтирилган кадрлар тайёрлашнинг самарали моделини шакллантирмоқда.