Прокуратура органларида комплаенс ва коррупцияга қарши курашиш тизими жорий этилганлиги муносабати билан Ўзбекистон Республикаси Ҳуқуқни муҳофаза қилиш академиясида шахсий хавфсизлик бўлинмалари ходимлари учун навбатдаги қисқа муддатли малака ошириш курси ташкил этилди.
Ўқув дастури доирасида тингловчилар халқаро стандартлар асосида прокуратура органларида коррупцияга қарши ички назорат тизимини жорий этиш, коррупциявий хавф-хатарларни минималлаштириш ҳамда коррупциянинг олдини олишнинг самарали механизмларини ўргандилар.
Машғулотлар давомида замонавий ахборот технологияларидан фойдаланиш масалаларига алоҳида эътибор қаратилди. Жумладан, OSINT инструментларидан фойдаланиш, электрон маълумотлар базалари билан ишлаш, очиқ манбалар таҳлили асосида хавфларни аниқлаш ва бошқариш, коррупциявий ҳолатларни дастлабки босқичларда фош этиш каби йўналишлар кўриб чиқилди.
Амалий кўникмаларни мустаҳкамлаш мақсадида Божхона қўмитаси ва Коррупцияга қарши курашиш агентлигида сайёр ўқув-амалий машғулотлар ташкил этилди. Тингловчилар мазкур тузилмаларда коррупциявий хавф-хатарларни таҳлил қилиш ва бошқаришнинг замонавий амалиёти билан танишдилар.
Курс якунида тингловчиларнинг билим ва кўникмалари баҳоланиб, муваффақиятли якунлаганларга тегишли сертификатлар топширилди.